ORANJESTAD: Informacion ricibi di capital Oranjestad di e isla di St. Eustatius, ta indica cu e actual comisario di gobierno,
señorita Alida Francis lo bay bira e siguiente Gobernador di e isla den lunanan venidero.
Staatssecretaris Alexandra van Huffelen, a manda nomber di e nominado pa Conseho di Ministronan. E fecha riba cual e lo wordo nombra ainda no a bira conoci, pero esaki lo bay ta ora cu Decreto Real Fase 3.0 di e Ley di Restauracion di Provision di St. Eustatius ta drenta na vigor. Na e mesun momento, e intervencion financiero administrativo pa St. Eustatius lo finalisa, y e puesto di comisario di gobierno lo stop di existi.
E nombramento di Gobernador lo bay completa e regreso na democracia na e isla, poniendo un fin na e intervencion di Den Haag cu a cuminsa na 2018. Esey nifica cu for di e momento ey adelante, St. Eustatius lo bay ta responsabel pa maneha su mesun tareanan administrativo. Ademas, e representante di Reino lo bay dispone di un serie di poder adicional, te ora cu e ley caduca dia 1 September 2024.
Señorita Francis a huramenta como comisario di gobierno na 2021, despues di a yega di wordo apunta como comisario interino di gobierno na 2020.
Cu e nombramento aki, Alida Francis ta bira e prome Gobernador femenino di St. Eustatius.
