Posibel kortsluiting durante di yena jetfuel
- Reaccion rapido a evita lo peor
ORANJESTAD (AAN): Diasabra den oranan di merdia, Crash Trucks di Cuerpo di Bombero staciona na Post Oscar, esta na Sabana Berde a sali pa un incidente ey mes riba Plataforma di Aeropuerto Internacional Reina Beatrix.
A sali na cla, cu un Refueler Truck di e compania FMSA cu tabata haciendo trabao pa yena tankinan di un Boeing 737 di American Airlines cu jetfuel tipo JetA1, diripiente a mira con huma cu kizas candela a cuminsa sali for di parti patras di e Refueler Truck aki.
Ademas di bati alarma pa notifica Bombero, e personal eynan mes a core pasa man pa un aparato di paga candela, y cu e Fire Extinguisher aki a paga e candela, evitando cu esaki lo plama. E forma exacto di usa Fire Extinguisher directamente riba e fuente di candela, ta demostra e experticio di e trahadornan aki na Aeropuerto cu danki na varios curso sa bon con pa atende emergencianan asina.
Pa evita cu lo por tin mas huma ta sali, a laga Crash Trucks yega pa asina atende y paga e candela completamente, y e corto-circuito a wordo elimina. No ta conoci si acaso aki a activa “Klein Alarm” of no.
Decision a cay pa move e Refueler Truck aki mesora di eynan, pa asina hibe na un lugar isola pa asina check e situacion mihor. Durante tur esaki, ningun pasahero ni tripulante di avion tabata den peligro. Pasobra e trahadornan di e Refueler Truck aki tin un “situational awareness” constante di loke ta pasa rond di nan, y mesora a actua ora di mira loke ta pasando.
E incidente aki no a afecta e compania FMSA, como cu na Aeropuerto nan tin 7 di e Refueler Truck aki pa jetfuel tipo JetA1 pa sirbi avionnan. Cada uno di e Refueler aki tin capacidad di 10.000 Gallon (como 37.850 Liter) di jetfuel.
Palabra di admiracion pa esnan di FMSA, demas personal riba plataforma, y Cuerpo di Bombero cu a actua rapido. Sigur un incidente cu danki na actuacion rapido di e operator di e Refueler Truck a evita lo peor.
