Algun studiante di John Wesley College a gradua hunto cu esnan di Abraham de Veerschool

Desaroyo interesante na San Nicolas

ORANJESTAD (AAN): Siman pasa, Minister di Enseñansa y Deporte Endy Croes a atende Graduacion di Commandant Generaal Abraham De Veer School na Holiday Inn Ballroom.

   E anochi aki, tabata uno special como cu Abraham de Veerschool a “absorba” algun alumno procedente di John Wesley College, y tabata contento di anuncia cu nan a gradua y tabata presente pa busca nan diploma e anochi ey.  Manera ta conoci, Fundacion SPCOA a dicidi na cera e scol ey debi cu e cantidad di alumno ta masha abao mes.

   Minister Endy Croes a duna un discurso y a felicita e graduadonan di Abraham de Veer School di aña 2023. E aña aki un total di 79 porciento alumno a gradua. Den nos vision di Enseñansa den Transicion 2021-2025 a identifica dos pilar di vital importancia, esta PEN 2030 y Sustainable Development Goals (SDG) cu ta e agenda 2030 di Nacionnan Uni. SDG 4 ta dirigi pa crea enseñansa di calidad cu inclusion, “Lifelong Learning” y duna tur alumno e oportunidad pa siña e habilidad- y competencianan di siglo 21.

   E SDG 4 ta papia di e habilidad di siglo 21 y a stimula e cuater (4) C-nan, cual ta para pa comunicacion, colaboracion, pensamento critico (critical thinking) y creatividad.

   Finalmente, Minister Endy Croes ta gradici directora Jane Bueno-Hooft y tur esnan cu a contribui den e logro di e graduadonan y desea tur graduado hopi exito den e siguiente etapa di nan bida.

   Directora Jane Bueno-Hooft a indica na Ministro, cu Abraham de Veerschool ta antoha hopi pa haya un gymlokaal, pero como cu den henter e area ey di San Nicolas no tin un bon facilidad deportivo, el a hasta sugeri pa bin cu un gymlokaal gigantesco estilo Centro Deportivo Betico Croes, cu lo no djis wordo usa pa e scol ey so, sino pa henter comunidad di San Nicolas.