Algun minister a comparti nan sentimento riba Facebook prome cu nan huramentacion

ORANJESTAD (AAN): Dialuna atardi, falta algun ora of minuut pa nan huramentacion,

por a mira cu riba Facebook algun di e ministernan a publica algun imagen mustrando nan sentimentonan relaciona cu e momento special aki, cual a tuma lugar na e Cas Ceremonial di Gobernador.

Por a mira Dangui Oduber, cu lo ocupa e funcion di Minister di Salud y Turismo, posando cu su yiunan. El a expresa: " Nos ta cla pa bai huramenta pa sigui sirbi nos dushi pais Aruba. Cu Dios por guia nos den e proceso aki".

Endy Croes, Minister di Educacion y Deporte a expresa ora di a bishita e graf di su mama stima: " Danki Pa e fe y Ma Sofia pa e balornan humano y dignidad  cu a wordo inculca den nos. Mi sa Bosonan lo ta orguyoso awe y for di shelo lo guiami. Love you".

Glenbert Croes, Minister di Labor, Integracion y Energia, posando riba un potret hunto cu un di su dos yiu muher y su casa a manifesta: "Nos lo cuminsa e era di recuperación pa henter Aruba, comienso di Gabinete Wever Croes 2 awetardi".

Xiomara Maduro, Minister di Finansas y Cultura: "Nos ta cla pa bay huramenta como Minister di Finansa y Cultura pa Pais Aruba. In de Naam van de Vader, de Zoon en de Heilige Geest, Amen".

Evelyn Wever-Croes, Minister di Asuntonan General, Innovacion, Oganisacion Gubernamental, Infrastructura y Planificacion Teritorial y Prome Minister a comparti un potret hunto cu Minister Xiomara Maduro y a expresa:  "Na caminda pa huramentacion. Gabinete Wever-Croes 2. Den nomber di Dios tur cos ta bai bon".

E dos ministernan di RAIZ, Ursell Arends (Integridad, Naturalesa, Transporte y Cuido di e grandinan, Vice-Prome Minister) y Minister Geoffrey Wever (Asunto Economico, Comunicacion y Desaroyo Sostenibel, no a publica riba social media prome cu e huramentacion.

DIARIO ta desea Gabinete Wever-Croes II hopi exito durante e 4 añanan di gobernacion.