Un solo briyante na Aruba ta sconde e berdad di temporada di horcan - *Despues di Rose y Peter solamente cuatro nomber mas di alfabet - *Region di Caribe ta drenta e parti mas activo di temporada di horcan
ORANJESTAD(AAN)—Ta haci un calor intenso. Pero solo ta briya y ta haci hende kere cu e temporada di horcan por wordo lubida.
Nada ta mas incorecto cu esaki ya cu awor e parti di e temporada di horcan, cu segun cifranan acumula ta produci mas actividad pa region di Caribe a cuminsa.
Paisnan manera Mexico y sigur partinan di costa Mericano cu ta resorta bou e region Atlantico di horcan, por papia di e destruccion cu a keda atras te awor provoca pa actividad di horcan fuerte.
Na Augustus e servicio di horcan di Merca, cu ta centralisa y asina suministra tur informacion oficial pa e region Atlantico, a tene su mes na un total di 15 pa 21 sistema cu lo alcansa forsa di tormenta y haya nomber na 2021.
Un total di 7 pa 10 sistema lo a alcansa forsa di horcan di cual 3 pa 5 lo por bira mas fuerte.
Un calor intenso ta sigui mustra Aruba riba e presencia di actividad di tormenta tropical den e seccion Atlantico, cu na 2021 lo tabata menos fuerte cu 2020 pa loke ta trata su prome parti.
Esaki ta debi na e hecho cu ta wordo spera cu e fenomeno El Niño cu ta stroba formacion di tormentanan y horcannan, lo no presenta su mes pero cu contrario na esaki, ya e region lo a cuminsa conoce La Niña, cu ta percura pa mas actividad den Atlanico, region di Caribe y Golfo di Mexico.
El Niño ta nomber di e fenomeno di tempo den Oceano Pacifico, cu ta influencia e situacion den Region di Caribe y ta bay contra e formacion di hopi actividad di horcan.
Na 2021 e lo no presenta pero si su opositor manera ya por nota den e hecho cu na 2021 ya e seccion Atlantico di temporada di horcan, a uza e gran mayoria di nombernan di horcan cu tabata riba lista.
Uzo di e alfabet Griego den temporadanan pisa a resulta di ta causa confusion ya cu e alfabet Griego conoce nombernan cu no ta otro segun e sistema di e Alfabet Latin, cu Papiamento tambe conoce.
Na e momentonan aki ya Atlantico a ta yega na final di e lista di 21 nomber na Latin pa e temporada di horcan 2021.
Ayera por a nota presencia di Peter cu lo a bay pasa pa Noord di region di Caribe, cu no a bati alarma di horcan ni tormenta debi na e ruta cu Peter a sigui y tambe e presencia cercano di un sistema friu cu ta afecta bida di Peter.
Tras di Peter por nota presencia di Rose, cu tambe ta wordo spera di desvia.
E grafico cu ta ilustra e situacion cu ta wordo spera dentro di cinco dia pa Atlantico, por tuma nota di formacion di un sistema nobo cu por haya e nomber di Sam, cu lo laga atras riba e lista solamente Teresa, Victor y Wanda pa 2021.
Esaki lo nifica cu 2021 lo por conoce e lista adicional pa tormentanan y horcannan na 2021.
Region di Caribe mester tene na consideracion tambe cu hustamente na September y October, e sistemanan cu ta nace riba of dilanti di costa di Africa, ta biaha mas den direccion di region di Caribe debi na presencia di sistemanan frio cu ta cuminsa baha for di costa di Merca.
Cifranan ta mustra cu den e temporada aki, Aruba mester vigila tempo y tambe tene cuenta cu sistemanan tropical ta cuminsa cana na forma diferente.
DIARIO lo mantene Aruba informa di tur desaroyo.
