ORANJESTAD (AAN)- Algun mayor a tuma contacto cu DIARIO pa mustra nan disgusto, tocante e sistema cu un scol MAVO a subi e asina yama “SKOA-geld”
sin previo aviso, pero ta ora nan a bay inscribi nan yiu, y a bay paga e suma custumbra, nan a haya e sorpresa cu SKOA-geld a subi cu 75 florin.
E suma cu segun e mayornan tabata paga na 2020-2021 ta 175 Florin pa SKOA-geld y 150 Florin pa Aircogeld, pues un total di 325 florin.
Dia di inscripcion nan a haya sa cu ta 400 florin nan tin cu paga: 250 pa SKOA-geld (cu a subi cu 75 florin) y mesun 150 pa Airco-geld.
Un par di mayor no tabata tin e suma completo di 400 florin e ora ey, cu nan. Pues, scol a keda pendiente cu prome cu aña escolar nobo cuminza, tin cu paga e suma nobo completo.
E carta tocante e aumento di tarifa aki mayornan a haye despues di dia di inscripcion.
Un mayor a comenta cu danki Dios scol ta cuminza mas laat, pasobra esnan cu no a cobra salario prome cu scol cuminza, nan yiu lo no por a drenta te cu e suma di SKOA-geld ta full paga.
E hecho no ta cu mayor tin cu paga mas. E hecho ta ora cu entre scol y mayor e comunicacion ta faya y, incluso, si ta trata di placa, den e situacion cu e famianan ta aworaki, cu menos entrada, cualkier aumento cu bin riba un tarifa cu tabata fiho, mester wordo avisa cu anticipacion pa mayornan prepara, y no cu ora di inscripcion nan ta haya e sorpresa.
Por compronde cu e situacion ta dificil pa scolnan catolico, pero no mester lubida cu e mayornan tin cu sostene nan famia cu menos, y cu nan tampoco tine facil. Ohala e scol concerni lo tene cuenta cu esaki den futuro.
