Mesun prijs desde Januari 2020... ORANJESTAD (AAN): Oficina di Estadistica ta mustra cu prijs di utilidad (electricidad y awa), gasolin y diesel
ta wordo determina primordialmente door di e prijs internacional di petroleo. Na Juli 2021 e prijs promedio pa bari di petroleo (US$ 72.61) a conoce un subida di US$ 1.64 (2.3%) compara cu Juni 2021 (US$ 70.97).
Manera DIARIO ta keda ripiti semper, desde Januari 2020 e tarifa di coriente na Aruba no a cambia! Awor oficina di estadistica un biaha mas tambe ta mustra cu e prijs di electricidad y di awa no a cambia compara cu Juni 2021. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05.
Prijs di gasolin a registra un subida di Afl. 4.90 cent (2.2%) na Juli 2021 y a causa un efecto di 0.10 ppt riba e CPI. Prijs di diesel a registra un subida di Afl. 5.70 cent (3.1%) na Juli 2021 y a causa un efecto di 0.01 ppt riba e CPI.
Na Juli 2021, utilidad, gasolin y diesel como grupo, tabata tin un subida di prijs di 0.7% compara cu Juni 2021 y hunto tabata tin un influencia di 0.11 ppt riba e CPI, mientras cu e restante 404 bienes y servicio hunto, a conoce un subida di prijs di 0.4% tabata tin efecto un efecto di 0.34 ppt riba e CPI.
