ORANJESTAD (AAN): Riba Diamars, Minister Gerlien Croes a tene un reunion importante na sede di Gobierno.
Esaki ta ora cu el a cera conoci cu Sr. Ramón “Chico” Negrón, kende manera DIARIO a trece dilanti caba, ta e Chargé d’Affaires nobo di Consulado General di Merca staciona na Curaçao.
Negrón a viaha bin Aruba y a reuni e.o. cu Ministro Croes, y den esaki a combersa entre otro di e situacion actual y futuro di e studiantenan di Aruba na Merca.
Algun luna pasa, Ramon ‘Chico’ Negrón a bira e persona Encarga di Negoshinan (‘Chargé d’Affaires’) di Consulado General di Merca na Curaçao, y Mision pa Aruba, Bonaire, Curaçao, Saba, St. Eustatius y St. Maarten.
Señor Negrón ta un Oficial Superior di Servicio Exterior di US Department of State. El a asumi su puesto como Chargé d’Affaires ora cu el a yega Curacao riba Diamars 18 di Februari 2025. Negrón awo ta cubri e funcionnan di Consul General y Hefe di Mision.
El a nace y crece na San Juan (Puerto Rico), y Negrón tabata diplomatico pa 26 aña caba, y mas recien tabata Director di Strategia di Hemisferio Occidental na e National Security Council. Su trabaonan anterior tabata Guadalajara (Mexico), Bern (Suiza), White House Situation Room na Washington, Havana (Cuba), Director di US Regional Embassy Office na Basrah (Irak), Deputy Economic Counselor na Canberra (Australia), Director di International Narcotics and Law Enforcement Sections na Panama y Pakistan, Deputy Economic Counselor na Beijing (China), y Economic Counselor na Embahada Mericano na Bogota (Colombia).
Negrón a sirbi tambe den Ehercito Mericano pa mas di 22 aña, riba servicio activo y como reservista, y a retira cu e rango di Lieutenant Colonel. El a ricibi un Bachelor of Science di US Military Academy na West Point, y un titulo di Masters den International Economic Policy for di Columbia University. E por papia Spaño, Frances, Portugues, Aleman, y Chines. Su casa Debra tambe ta un Foreign Service Officer, y nan tin dos yiu muhe.
