Alexia Chin di Aruba eligi como Miss Internacional de los Mares y del Turismo

Na Costa Rica - ORANJESTAD (AAN): Diasabra anochi laat a tuma lugar na Tambor Beach na Costa Rica, e certamen di Reina International de los Mares y del Turismo, na cual diferente candidata a participa den diferente categoria.

   Aruba a manda Alexia Chin, kende na 2019 a sali un di e finalistanan di e certamen di Miss Youth Aruba.  Cu su preparador Roberto Avalo y delegacion di famia y mas, el a ricibi un fabuloso apoyo durante e dianan cu e tabata eynan.

   E certamen final mes a tuma lugar den Ballroom di Barceló Tambor, unda a warda pa corona e titulo di “Miss” te na ultimo.

   Y esaki a bay pa Alexia Chin!  Esaki a pone publico bira loco di felicidad.  El a bira pues e ganadora maximo di e certamen.

   Demas premio cu Alexia Chin a logra na e certamen ta, e premio di “Mihor Fashion”, tambe “Mihor Trahe di Fantasia”, “Mihor Silueta”, y “Mihor Modelo”.