*Kico hunto cu Gobierno por haci pa mehora deporte - ORANJESTAD (AAN) – Nicole Hoevertsz, Secretaria General di Comite Olimpico Arubano (COA), recientemente nombra como Vicepresidente di e Comision Olimpico Internacional,
a reuni cu Formador Evelyn Wever-Croes, den e contexto di reunionnan cu stakeholders externo, den e proceso di formacion di Gabinete Wever-Croes II.
Señora Hoevertsz, den conferencia di prensa sigui na e reunion cu Formador, a duna su relato relaciona cu dicho encuentro.
“Pa Comite Olimpico Arubano tabata un honor di por a wordo invita pa Formador di Aruba, y nos a bisa den nos introduccion cu esaki tabata e prome biaha cu COA a wordo invita pa Formador, pa un reunion”, señora Hoevertsz a comenta.
El a agrega cu ora ta menciona COA, no ta menciona solamente e personanan cu tabata presente pero e directiva, e staf di nan oficina, 24 federacion afilia, tur e clubnan miembro y e miles di deportistanan cu ta afilia na e Organizacion aki.
“Kiermen, pa e reconocimento aki nos a expresa nos gratitud y nos aprecio. Tabata presente e presidente di COA, señor Roy Mezas, e Vicepresidente señora Wanda Broeksema, y mi persona. Y nos a trece dilanti e puntonan di prioridad y atencion, di parti di COA. Locual cu nos a haci awe, no tabata pa repasa loke a pasa e ultimo añanan y sigur no, locual cu a pasa den e aña di Covid-19, e efecto cu e pandemia tabata tin pa cu deporte. Nos no tabata kier wak esey. Locual cu tabata kier a haci tabata wak dilanti. Kico nos ta desea fervientemente di haci, y hunto cu Gobierno, pa envez di keda wak patras, kico no a bay bon, wak kico nos por haci conhuntamente pa mehora deporte na Aruba”, Nicole Hoevertsz a señala.
El a agrega cu den esaki, COA a entrega na final di e reunion, un copia di un carta cu un resumen di tur e puntonan cu nan ta kere cu ta bon pa Minister y Formador, tene cuenta cune.
“Na prome lugar, nos ta spera cu e gobierno nobo, cu lo wordo forma ohala pronto, y cu lo conduci na nombramento di un Minister di Deporte nobo, pa duna mas reconocemento y mas balor na deporte. Nos ta kere cu deporte ta mucho mas importante cu loke Aruba ta dunando e aworaki. Mi ta kere cu si nos duna mas atencion y balor na deporte, nos lo tin un comunidad mas sano, mas inclusivo, mas respetuoso pa hende homber y hende muher, hendenan hoben, hendenan adulto, hendenan cu tin tur habilidadnan y hendenan cu tin nan deficiencianan fisico y/of mental. Tur eseynan, por beneficia di deporte. Pa nos, deporte no ta un meta final; pa nos, deporte ta un medio pa logra metanan grandi pa nos pais”, Hoevertsz a subraya.
COA ta desea di tin un miho comunicacion cu gobierno, e dama a agrega. El a señala cu ora nan ta papia di gobierno no ta identifica minister di deporte so, pa COA deporte ta algo cu ta “overstay” e ministerionan. Pesey e ta algo cu COA a wak hopi den direccion di Formador, den e Prome Minister, pues e ta algo cu toca diferente cartera: deporte, salud, educacion, husticia, asunto social, turismo, economia. Tur di nan ta wordo toca door di e topico di deporte y pesey mes e ta algo cu mester haya e atencion aki, Nicole Hoevertsz a señala.
