Marc Figaroa, director di APA:
ORANJESTAD (AAN) – Manera ta conoci, e mundo crusero ta traha cu “season” (temporada halto y temporada abao di turismo) conoci den e industria aki como “Seasonality”, y tocante esey Señor Marc Figaroa, director di Aruba Port Authority, a elabora den entrevista cu DIARIO. El a subraya cu Aruba ta den 'low season'.
Figaroa a acentua cu e industria di crusero ta wordo maneha asina, y por ehemplo, Alaska, Europa, Mediteraneo ta bira popular den verano.
“Pues, hopi companianan di crusero ta aloca nan barconan pa e destinacionnan aki. E ta algo cu pa añanan nos ta trahando pa, toch, nos por trece mas 'calls', y tin cu bisa toch cu e temporada aki di 'low season' ta recuperando, e ta bayendo positivamente, e ta creciendo, no manera e mercado ta manifesta su mes”, director di APA a señala.
Figaroa a señala cu Alaska ta un destinacion cu nos no por competi facilmente cu ne. E ta un di e destinacionnan mas popular den e temporada aki, y cu ta genera mas entrada pa e lineanan crusero y e tin un ventaha global riba nos y otro destinonan.
“Esey ta haci tambe cu nos kier pusha pa e 'low season'. Pa e high season nos ta mantene loke nos tin, nos ta premira un high season cuminzando fin di october, basta druk. Specialmente december, cu nos tin un demanda basta grandi; te cu aworaki, e ta mustra positivamente”, director di APA, señor Figaroa a duna di conoce.
El a agrega cu, mas cu claro, APA a monitor e situacion global, pues situacionnan cu tin mundialmente toch, pa wak si ta mira un impacto.
“Te na e momentonan aki, nos no ta mira ningun impacto pero depende di e situacion global si e bay escala, intensifica un poco mas, y mi ta kere cu nos mester tene esaki bon den bista”, director di APA a señala.
Figaroa a indica cu den 'low season', Aruba ta un di e destinacionnan cu ta keda ricibi barco, alrededor di cada dos siman, Royal Caribbean y Carnival Cruise Lines, dos di e lineanan crusero mas importante pa Aruba, cu tin un mercado gasta grandi di pasaheronan cu nan ta trece pa nos.
“Pero nos tin un bon relacion cu nan y nos a establece tambe y Aruba su nomber ta hopi fuerte tambe, y esey ta haci cu e ta bira un destinacion atractivo, unda cu nan ta keda sirbi, apesar cu ta low season”, director di APA, Marc Figaroa, a señala.
