ORANJESTAD (AAN): Departamento di Cultura Aruba (DCA), den cooperacion cu Fundacion Popcorn y bao auspicio di Ministerio di Cultura Aruba,
ta presenta cu hopi orguyo e proyecto vacacional: Dream, Dare, Do & Competencia Hubenil Gang di Arte 2025.
DCA ta hopi contento di por anuncia cu e competencia hubenil Gang di Arte ta den pleno preparacion y desaroyo.
E invitacion ta habri pa tur hoben entre 13 te 21 aña cu tin interes pa participa den e trayecto creativo y formativo. E aña aki Gang di Arte ta celebrando su di 19 aña di existencia.
E competencia a bira un plataforma consisti pa hobennan creativo y continuamente ta mustra talento, calidad y entusiasmo di e hobennan.
DCA ta sigui eleva e nivel di e competencia ofreciendo premionan relaciona cu e area di specialisacion di e ganado(nan), cu tambe lo sirbi como “cara” di e competencia y representa Gang di Arte durante evento y actividadnan nacional y internacional durante un aña.
E trayecto ta cuminsa entre diahuebs 17 te diasabra 26 di juli, cu tayernan central.
E periodo di preparacion lo sigui pa desaroya e obranan creativo y e gran final di competencia hubenil Gang di Arte cu lo tuma luga diabierna 29 di augustus, caminda ta saca e ganadonan pa cada disciplina artistico y entre e prome luganan lo apunta e ganado absoluto lo wordo selecciona. E persona cu gana lo representa Aruba den un intercambio internacional.
Luga di e tayernan y encuentro: John F. Kennedy Education Center, y pa inscribi, bishita e website aki:
E competencia hubenil Gang di Arte ta un proyecto artistico cu a cuminsa desde 2007, organisa pa Departamento di Cultura Aruba, e proyecto aki a conta cu colaboracion cu Departamento di Asunto Social (DAS), Fundacion Desaroyo Educativo Comunitario (FDEC), Atelier ’89, Cede Aruba, Mascaruba y Cas di Cultura Aruba.
Gang di Arte a crece pa bira e mas grandi y popular como un proyecto inspira riba formato internacional manera “Kunstbende” na Hulanda y “Luna yen” na Corsou.
For di aña 2021 e ta parti di e programa “Dream, Dare, Do” ta stimula participacion activo den arte y ta habri porta pa hobennan desaroya nan talento creativo den diferente tereno: Pues baile, teatro, musica, arte visual, video art, literatura, arte di palabra (poesia, cuenta cortico), diseño, dj, fotografia, moda y mas.
Bo por participa den tur tipo di baile: folklorico, moderno, contemporaneo, danza-teatro, etc. Tambe den musica: cu instrumento, canto of composicion. Tambe Teatro: drama, comedia, poesia, historia oral, arte di palabra. Arte visual: pintura, scultura, video art, moda, cine y fotografia. Tambe den deporte creativo.
Participacion ta totalmente gratis. E trayecto ta cuminsa cu e tayer central di dream, dare, do, unda tur hoben por forma grupo y prepara pa e competencia hubenil. E ganadonan lo tene e honor di representa Aruba den un intercambio internacional. Si bo tin talento y kier comparti bo potencial, esaki ta bo oportunidad. No perd’e.
