Con Nicolas Maduro lo honra e acuerdo pa eleccion democratico?
*Candidato pa Oposicion cu mayoria di 7 Miyon den exterior
ORANJESTAD (AAN) — Mundo liber a yega na un acuerdo cu Nicolas Maduro pa eleccionnan 2024, cu lo dicidi si Nicolas Maduro lo keda na mando di e pais na 2025 of si e mester bay cas.
For di momento cu nos skirbi e palabranan aki, practicamente nos tin e contesta kico lo pasa y mas nos ta keda asombra di e inocencia cu mundo democratico aparentemente tin enfrente regimennan totalitario.
E rio di azeta di Venezuela ta core atrobe pa tur cu kier yuda Nicolas Maduro bira popular na Venezuela, aunke Merca ta keda cu e derecho pa bolbe impone e sancion di Nicolas Maduro no cumpli cu loke el a priminti, cu ta eleccionnan liber.
Ora papia di Nicolas Maduro y eleccion liber, automaticamente mester lanza si e pregunta si hende por uni raton cu keshi.
Mas impresionante pa nos ta bira e retratonan di un candidato cu a wordo eligi dor di Oposicion di Venezuela pa participa como oponante di Nicolas Maduro durante e eleccionnan di 2024.
Na Barbados recientemente a firma e acuerdo cu e eleccionnan lo ta democratico. Esaki ta haci nos puntra nos mes, kico hende ta considera ainda democratico.
Den porta di eleccion na Venezuela, en todo caso Nicolas Maduro a haya oportunidad pa haci uzo di e petroleo Venezolano cu tabata mara na e sancionnan Mericano, cu a wordo elimina a base di e promesa di Nicolas Maduro cu eleccion lo ta limpi.
Manera a bisa, oposicion a eligi un candidato cu segun e reglanan di e Conseho Nacional Electoral di Venezuela di Nicolas Maduro, no ta cualifica pa ta candidato. Con e lo ta candidato, ta keda pues e pregunta.
Importante ta e reacionnan di e Pueblo di Venezuela, cu ta sigui sufri y cu ta na haltura cu e por bay prison como preso politico di e regimen di Nicolas Maduro.
Pero Opositornan di Nicolas Maduro a eligi na candidato pa bay eleccion aunke nan no tin seguransa cu e lo cualifica pa bay eleccion segun e reglanan cu lo wordo mantene pa hende bay eleccion.
Su partido a base di e entendimento cu a wordo firma, por haci publicidad pa su mes y por tin tur libertad pa presenta su mes na publico.
Perro e ta cumpli cu e condicionnan pa por ta candidato?
E disputa riba e punto esencial di e candidatonan pa reta Nicolas Maduro a cuminsa.
Kende ta cualifica pa participa na e eleccion?
Te ainda Oposicion y e Gobierno di Nicolas Maduro no por yega na un entendimento. Pero e hecho cu Nicolas Maduro lo tene eleccion democratico, a habri caminda pa sancionnan Mericano por lo pronto stop di existi y Gobierno Nicolas Maduro por haya entrada den porta di eleccion!
