ORANJESTAD (AAN) – Dia di Portugal a wordo celebra na Wilhelmina Park, diamars di e siman aki,
unda cu Prome Minister señor Mike Eman, a dirigi un emotivo discurso.
E dignatario a expresa cu e dia aki a celebra e sentido di patriotismo na esnan cu a bin establece nan mes na Aruba, mas di sesenta aña pasa, y a trece den nan curazon.
“Y di esaki nos ta reconoce e sentimentonan di orguyo, di FE, speranza y amor cu un Isla manera Madeira, for di cual gran parti di e Colonia Portugues cu a establece su mes na Aruba, a bin.
Den momentonan cu bo haya oportunidad di conoce di cerca famianan portugues, amistadnan portugues, bo ta reconoce e calor di nos Isla tambe.
Bo ta reconoce e sentido di convivencia, e simpatia y e solidaridad. Y, durante di un bishita na Madeira, mi por a siña hopi di locual e famianan cu a bin Aruba a trece pa nos.
Pasobra e ta un Isla cu a wordo construi a base di trabao duro, a base di FE den nos Creador, a base di e amor pa nos conciudadanonan, cu hunto a construi e Isla ey, cu a bira un di e Islanan cu mas porvenir den henter e region Europeo.
Pa nos ta un orguyo cu e comunidad Portugues, hopi for di Madeira, a bin comparti cu nos, e talentonan special aki. Unda cu bo bira na Aruba, pa chikito cu e comunidad ta, bo ta mira un contribucion di inteligencia, talento y valentia di e comunidad portugues.
“For di e organo mas halto di nos pais, y e Gobernador Interino, e Procurador General, pa educacion na Aruba, den Literatura di Aruba, den e construccion economico di Pais Aruba, den cada faceta di nos comunidad, tin energia, talento y devocion portugues”, Minister Presidente Eman a expresa.
Seguidamente, el a pidi un aplauso fuerte pa e contribucion aki, di e comunidad portugues na nos pais.
“For di nos curazon nos ta comparti e dia aki cu e comunidad portugues, pasobra nan no a trece unicamente nan contribucion, talentonan, produccion, nan vision, pero nan a trece tambe e calor Isleño cu ta haci nos tambe reconocibel den tur, cu ta biba aki y hunto cu nos ta traha e miho porvenir pa Aruba. Hopi, hopi danki pa boso contribucion y cu Dios sigui guia nos den e tarea importante di forma un comunidad uni, dedica na prosperidad di un y tur riba e baranca aki”, Premier Mike Eman a conclui.
