Comerciante cu mas di 25 aña estableci:- Competencia inhusto cu rebendedor ta e problema
ORANJESTAD (AAN)- Un comerciante kende a establece na Aruba mas cu 25 aña pasa, y cu for di comienzo ta inscribi na Camara di Comercio manera mester ta, a tuma contacto cu DIARIO, pa duna su opinion tocante e pakico costo di bida ta asina halto na Aruba, locual e ta haya tin nada di haber cu e ceramento di frontera entre Aruba y Venezuela.
E comerciante tin un negoshi di, entre otro, fruta y berdura hopi varia cu e ta importa for di Colombia, e mes ta mayorista pero tambe ta bende na detal. Su principal clientela ta hopi di e supermercadonan Chines, cu tur diaranzon ta yega busca mas tanto fruta, hortaliza y berdura, y algun restaurant.
E comerciante a comenta cu e doñonan di supermercadonan Chines cu ta cumpra cerca dje, ta cumpra pa caha por ehemplo tomati, awacati, lamunchi, batata, banana, y algun fruta, na prijs hopi razonable, pero pa nan tampoco e situacion ta bon y asina ta e caso pa mas negoshi estableci legalmente na Aruba, y cu tin añanan cu ta hacie despues cu a lanta chikito y crece bay den grandi cu hopi esfuerzo.
Pero aworaki a surgi e fenomeno di rebendedornan cu ta bende bao di palo y tambe tin hende residente (pues no naci na Aruba), cu ta lantando fruteria manera paddestoel. Nan ta busca un socio Arubiano, pero ta nan mes ta pone e placa y ta trece fruta y berdura di afo cu ta bin cu barco y ta bende nan un tiki mas barata, causando un competencia hopi inhusto y cu ningun instancia ta controla.
Di con e competencia inhusto? E rebendedor bao di palo of cu ta lanta fruteria den un pida di patio, of den nan garashi mes, no ta paga trahador, talvez ni impuesto, no tin cu paga huur pa local, y kizas ni sikiera ta inscribi na Camara di Comercio. Y ta claro, nan ta haya nan clientenan pasobra manera e situacion economico ta na Aruba awo, spaar un “yotin” ta algo.
E comerciante a constata cu tin varios hende ta sali bende fruta y berdura cas pa cas. Tin biaha hasta pisca! Nan ta ofrece 200 lamunchi pa 45 Florin, cla den un saco di manera cu e cliente no ta haya chens di scoge, pero e prijs ta atractivo “ohala e calidad tambe” e comerciante a expresa. Tambe nan ta ofrece tres awacati pa 10 Florin.
Di otro banda, e doñonan di supermercado Chines no kier perde nada y ora un awacati madura di mas, nan ta corte saca e parti malo y e resto nan ta bende pida pida bon paketa, pa prijs di un awacati henter.
E comerciante aki como supply ta esun cu tin cu inverti mas cu su clientenan Chines mes, pasobra e ta paga e flete, transportacion cu a bira hopi caro, tur e impuestonan cu comerciante ta paga. E ta bende tambe cu algun restaurant y ta comprendible cu nan cuminda a bira mas caro tambe, pasobra tur supply mester a aumenta nan prijs. El a subraya cu si bolbe habri frontera entre Aruba y Venezuela, e situacion no ta bay cambia.
