Airbus di American Airlines a sufri un ‘Tail strike’ ora di lanta vuelo na Aruba

Reclamo di ceramento di camindanan...

•  Avion a keda bula mas di 2 ora prome di regresa Aruba
• Raro cu Polisnan a consider a caso aki como ‘Groot Alarm’ 

ORANJESTAD (AAN): Un situacion tiki fastioso a presenta su mes Diahuebs merdia na Aeropuerto di Aruba na momento cu un avion di American Airlines ta lantando.  Algo cu rara vez ta keda registra, a socede net ora cu e avion aki tabata moviendo cu velocidad pa lanta vuelo.

   E avion ta un Airbus A321-200 cu matricula N120EE, cu ta bulando como vuelo AA870 for di Aruba rumbo pa Philadelphia, na estado di Pennsylvania na Merca.  Un vuelo cu lo a dura casi 5 ora.

   Sinembargo ora cu e avion tabata lantando pa 1:54 pm for di Pista 11 di Aeropuerto di Aruba, e avion a “rotate” demasiado y e parti di e rabo di avion a dal y lastra riba pista pa varios seconde, prome cu e avion a subi.

   Esaki ta wordo describi como un ‘Tail strike’, y tin su protocol pa sigui cu ne.  Si e Pilotonan mes a sinti esaki, nan tin di ricibi confirmacion di e personal di cabina cu ta sinta mas patras di avion.  Normalmente nan ta yama nan via intercom y pa nan duna confirmacion si nan a sinti “e frame di avion ta lastra” na tera ora di subi.

   Tail strike y protocol: Unavez cu haya confirmacion, aki tin di sigui protocol y tambe e ‘Standard Operating Procedures’ (SOP) di American Airlines den situacion asina.  Esaki ta encera cu e vuelo no por sigui mas pa e destinacion, y tin di busca forma pa ateriza bek.

   Pero prome cu esey, a informa Toren di Control di e ‘Tail strike’ aki, y na mesun momento informa cu nan lo kier regresa Aruba.

   Semper ora bo avion a lastra na tera como ‘Tail strike’, e personal di cabina por bay halto pero no pasa 10.000 pia, pues tin di keda mantene un altura safe.  E avion di American Airlines aki pesey a keda bula te na maximo 4.000 pia, y a pidi Control Aereo si nan por haya un espacio pa keda bula den circulo pa asina kima jetfuel pa asina por ateriza na forma safe.

   Tambe nan no ta ‘de-presuriza’ e avion, pa evita cu esaki lo por ocasiona scheur of buraco den e parti cu a lastra riba e pista.  Pues ta evita di duna e structura di avion stress of mas daño.

   Esey ta debi cu e pilotonan no tin ningun idea kico e daño ocasiona na e rabo di avion ta.

   Ademas di esaki, Toren di Control na Aruba mesora a saca su vehiculonan pa bay inspecciona henter e pista 11 di Aruba.  Pasobra si acaso tin obheto cu a kibra di e Airbus A321 aki ora di e ‘Tail strike’, tin di kita esaki pa evita cu otro avion ta dal den e obhetonan aki.

   Esaki ta algo cu a ocasiona un paro riba lantamento y aterizahe di mas avion.  E ora ta numeroso avion cu tabata yegando Aruba, incluyendo Delta Airlines, Copa Airlines, y otronan mester a cuminza circula wardando e trabao di revision riba pista keda cla.

   Na Aruba tambe, varios vuelo cu tabata cla pa lanta, a haya nan ta warda, pa como 40 minuut.  Te despues di 2:40 pm, a nota cu avionnan por a lanta bek, y asina e restonan cu tabata circulando riba Lama Caribe pabao di Aruba, a haya chens uno-pa-uno pa baha na Aruba.

   Mientras tanto, e vuelo AA870 a keda bula pa como 2:20 ora largo pabao di Aruba, ta ‘kima’ jetfuel pa asina haci e tankinan mas bashi, pa por haci un aterizahe mas safe.

   Cu un avion mas liviano, ora di ateriza lo eherce aun menos stress riba cualkier structura cu lo por a debilita ora di e ‘Tail strike’.  Pa tal motibo toch a percura pa Crash Trucks di Bombero tabata riba standby ora cu e avion a ateriza banda di 4:16 pm sin ningun problema.

   E vuelo pa Philadelphia a wordo cancela, y pasaheronan mester a haya acomodacion local.

   Autoridadnan demasiado severo: E sorpresa di mas grandi e atardi aki, ta con Autoridad a actua comosifuera ta ‘Groot Alarm’.  A ricibi hopi keho di personanan cu ta haya cu Polisnan a actua demasiado severo den e caso aki, siendo cu un boletin di Aeropuerto mes a indica cu e ta djis un ‘Standby Local’.  A cera varios acceso di caminda pa Aeropuerto, y pone turistanan baha y cana bon pida leu pa yega Aeropuerto.

   Un caminda e “texto di urgencia” entre Aeropuerto y Polis a wordo mal interpreta.  Ningun rato a papia di ‘Groot Alarm’.

   Aeropuerto a bisa textualmente den un mensahe pa prensa: “Esaki no ta considera como un emergencia, y e aeropuerto ta keda habri y operacional”.

   Pero pafo... Polisnan a cera tur caya, y pasaheronan mester a baha y cana basta leu pa yega Aeorpuerto cu nan maleta den man.  A mira Taxistanan baha pasaheronan for di banda di Citgo Wayaca, y aki e turistanan a cana bay zuid.

   Siendo cu Aeropuerto a indica cu e NO ta un “Groot Alarm” y ta djis un Standby Local.

   “Vuelo 870 di American Airlines actualmente ta bayendo bek na Aeropuerto Internacional Reina Beatrix despues di su despegue, como un precaucion.”

   “E aeropuerto a activa un Standby Local, cu ta nifica cu servicionan di emergencia ta den alerta como precaucion.  Esaki no ta considera como un emergencia, y e aeropuerto ta keda habri y operacional.”