ORANJESTAD(AAN): Dentro di poco ta bay tuma lugar e di 6 edicion di e asina yama Diabetes Run and Walk y segun organizador di e evento Franz Sydow,
e meta di e evento ta pa concientiza pueblo di Aruba riba e problema grandi di diabetes cu tin riba nos isla.
“E problema di diabetes na Aruba ta hopi grandi, unda cu nos tin dos biaha e cantidad average mundial, esta 16% di nos poblacion tin diabetes”.
Nos tur tin hende cerca, famia cu ta deal cu esaki y door di e careda nos por logra concientiza pueblo cu mester bin un cambio, pa asina nos por tin un poblacion mas saludable pa sigui bay dilanti, segun Sydow.
El a splica cu e aña aki e organizacion ta trahando hunto cu Jump 18, cu ta enfoca riba muchanan cu tin sobrepeso y ta siña nan kico nan por haci pa nan cambia nan estilo di bida.
E careda ta bay ta Diadomingo venidero y ta cuminza cu e careda di 10 kilometer cu ta sali for di Botica Eagle 05:45 y ta bay te The Cove bin bek.
E careda di 5 kilometer lo sali for di Botica Eagle 06:00 y lo bay te cu Blue Residences y bin bek.
Tur e caredanan di e muchanan lo cuminza 7’or di mainta, den e categorianan di 4 aña te cu 16 aña.
Esnan cu kier participa por inscribi na Diabetesrunaruba.com.
Sydow a splica cu ya caba e caredanan ta 95% yen.
“Nos ta invita tur compania pa por participa den grupo, pasobra e por bira un bunita oportunidad pa haci ‘team building”, segun Sydow.
