Tercer sistema tropical importante den region directo di Aruba
*October 2022 a entrega Aruba e union di elemento pa un desaster
*E sosten di prensa na responsabilidad di meteorologia pa scapa bida
ORANJESTAD(AAN)—Ora indaga den cifranan historico, por descubri con den un rato naturaleza por provoca mucho mas morto cu un guera y un pandemia.
Na decada 70, ta topa cu culminacion di un epoca den cual trabou riba tur tereno a exigi pa e trahador uza hermentnan nobo riba su tereno a base di su conocemento.
Den e epoca aki, Servicio Meteorologico cu tabata parti di e maneho gubernamental Antiano, a mira entrada di hobennan cu mester a sigui estudionan importante pa por a encarga nan mes cu e tarea di Servicio Meteorologico, cu un responsabilidad enorme.
Den e epoca di 70, cu profesionnan a haya un caracter nobo cu avance di ciencia, pa periodismo tambe a keda presenta e necesidad pa e periodista ta prepara pa por atende debidamente cu su encargo pa informa publico sigur ora peliger di horcan bati na porta.
Den e temponan aki noticia di condicionnan di tempo a cuminsa mira luz y a exigi di parti di periodismo, e preparacion necesario pa por atende cu informacionnan cu ta wordo entrega dor di Servicionan di Meteorologia na prensa pa informa Pueblo.
E realidad climatologico di Aruba, cu Creador a entrega un naturalesa unico ora papia di horcan, a crea tambe na Aruba e pensamento cu nada ta pasa y cu nunca un situacion peligroso lo no presenta.
Prome cu e desaroyonan e siman aki, ya na dos ocasion na 2022, e posibilidad cu un tormenta por afecta Aruba a presenta su mes.
Lamentablemente, e hecho cu hende a bira experto riba tur tereno, ta causa problema serio tambe sigur ora papia di peliger di tempo.
E siman aki Aruba a haya e prueba pakico Aruba mester ta prepara pa temporada di horcan, cu a causa desastre na tanto pais na 2022 tambe.
Pa cuminsa mester bay na e cuna di sistemanan tropical manera horcan, cu ta nace den e Zona di Convergencia Intertropical.
Esaki ta e nomber cu a wordo duna na e zona cu hunto cu solo ta biaha bay mas Noord y ta cubri Aruba tambe pa despues bolbe baha.
Den e zona aki bientonan di Noord Oost y Zuid Oost ta topa a causa pues convergencia.
Den e zona aki, ta topa cu situacionnan den cual e biento ta conoce cambio, ta haya forma di un ola pa despues bira e circulo cu ta centro di un sistema tropical. E presion di aire ta baha den e sistema aki, cu ta bira un circulo cu ta gira.
Aire cayente di lama, ta alimenta e sistemanan tropical, cu tin nan enemigo natural manera un through y un area di presion halto.
E siman aki, un area di sistema abou tabata acerca region di Caribe cu potencial pa bira tormenta tropical.
Riba portret di satelite por a mira presencia di un through cu ta un fluho di ariba pa abou normalmente pero tambe por bay “drumi” manera ta wordo bisa.
Generalmente un sistema tropical ta desvia pa un through pero tambe pa un sistema di presion halto, cu tabata e motibo cu den e caso aki e ola tropical cu por a bira cualkier momento un depresion tropical, no por a sigui un curso mas Noord pero a keda canto di costa Venezolano, cu tabata kibra su parti mas abou.
Elementonan decisivo pa formacion di un tormenta tropical a topa e siman aki den region di Caribe.
Expertonan den meteorologia den region di Caribe cu ta traha directamente cu National Hurricane Center, mester tabata sumamente cauteloso cu nan informacionnan y guia di paisnan den region di Caribe.
E sistema no tabata tin un centro visibel pero si tabata duna prueba cu cualkier momento e por haya un centro defini, un wowo.
E trabou di meteorologia, e responsabilidad inmenso di e profesion, a bini dilanti den un region incredulo ora ta trata peliger di un sistema tropical, sigur cu presencia di tur factor necesario cu a haci posibel cu na forma historico National Hurricane Center a anuncia cu e sistema tin 100 porciento di seguridad cu e sistema ta sigui desaroya.
Na momento cu Meteorologonan haci nan trabou, ta bira importante pa periodismo cumpli cu su tarea den interpretacion di e peliger na publico a base di conocemento di e materia, sin sensacion, enfrente e realidad di un fenomeno, cu por por mata mas hende cu cualkier enfermedad.
October tin e nomber di “Luna di Flor” cu ta producto di un temporada di awacero. Pero sigur un luna cu mester tene na consideracion como productor di problema di saturacion di suela, debi na e problema pa awa di yobida yega na lama.
Tres sistema tropical importante a presenta den e temporada di horcan 2022 den e vecindario te awor mientras mundo ta papia di mas actividad tropical cu cambio di clima.
