Tema crucial durante bishita di su Alteza Real Princesa Beatrix
*E solucion pa resultado Siglo 20 durante resto di Siglo 21
*Informacion clave riba clima di DIARIO central den simposio
ORANJESTAD (AAN) — Ta cu e cariño di semper, Aruba a saluda Su Alteza Real Princesa Beatrix, kende durante su bishita siman pasa, a suscribi importancia di desaroyo di diferente proyecto na Aruba y na un forma particilar a mustra riba e deber di uno y tur pa duna sosten na naturaleza, cu ta na peliger.
Ya prome cu 2023 a bati na porta DIARIO a mustra riba e exigencia sumamente dificil cu hende ta enfrenta, pa bandona e loke ta wordo yama “Era di Kleenex”, cu ta describi e forma cu hende a adapta su mes na e mundo di industrialisacion y perdida di balor no solamente di naturaleza pero hasta di tur loke ta esencial den bida humano.
“Kleenex” ta wordo uza como ehempel di no perde tempo den conservacion di loke a wordo uza, pero sigui e tendencia di Siglo 20 pa deshaci di tur loke a uza.
E sistema pa conserva y e mentalidad di ahorro cu ta clasico pa e mentalidad di Aruba den pasado, mescos cu rond mundo, a wordo afecta pa e tendencia di hasta abusa di cuminda cu ta resulta den baki di sushi pasobra ya hende a satisface su apetit.
“Nature Based Solutions” tabata e tema di e simposio na Universidad di Aruba. E obhetivo tabata pa atende cu e retonan den esfuerzonan pa conserva naturaleza den e proceso di desaroyo mundial.
Manera DIARIO den cantidad di articulo a trece dilanti, e reto grandi di hende enfrente un futuro di calidad, ta yega na un balansa entre desaroyo cu ta produci bienestar material y naturaleza cu ta dicidi pa calidad di bida di hende, cu den cambio di clima ta mira e calidad di bida humano na peliger.
Central pues den e presentacion, tabata con durante Siglo 21, hende ta remedia e forma cu industrialisacion, cu a culmina na Siglo 20, a afecta e bienestar fisico di hende y ta pone hasta e ambiente cu ta sostene bienestar fisico di hende na peliger.
Den presencia di Su Alteza Real Princesa Beatrix, representantenan maximo di Gobierno di Aruba a uni na participantenan di e simposio, pa papia di e futuro di bienestar di hende cu ta den balanza.
Actividadnan peligroso pa existencia y bienestar di hende y mundo, ta produci e placa cu hende mester pa desaroya mundo riba tereno financiero y economico, cu ta produci bienestar social pa henter mundo.
Sin entrada financiero, hende den ningun sistema, por sobrebibi. Entrada financiero no mester wordo mira den e sumanan di placa solemente, cu ta simbolisa e balor di benta di produccion den nos mundo actual.
Produccion comercial, den cual empleo y comercio ta uni, por intercambia producto tambe.
E forma pa yega na produccion ta e problema, manera sigur ramo industrial manera di petroleo ta indica.
Na 2023, mas y mas hende ta realisa cu no ta solamente refineria ta e problema, pero tambe otro sistemanan cu ta mishi cu naturalesa, manera sushi di baca cu ta afecta atmosfera.
Na Siglo 21, hende ta wordo confronta cu e necesidad urgente pa deshaci di cambionan cu a wordo introduci pa garantisa progreso material di hende pero awor ta herida hende y mundo.
Enfrente problemanan creciente y e necesidadnan di capital enorme, Aruba hunto cu henter mundo ta analisa, loke a pasa na momento cu e epoca di materialismo extremo despues di Segundo Guera Mundial a entrega mundo un mentalidad nobo, cu a deshaci di costumbernan valioso di ayera.
Pa yega na cambio mester di placa, cu ta un problema serio pa hende y paisnan cu a bandona e bon costumber y mentalidad di antes, pa no crea debe pero traha dam pa warda awa.
Ora analisa e balor di awa, cu a bira topico central na mundo, ta bolbe na e formanan di antes cu tabata traha rembak tambe pa haci uzo di yobida, pa hende tin awa potable.
Cu industrialisacion pues, hende a bandona e realidad di naturalesa, cu awe hende mester scapa di peliger serio pa futuro.
Con yega na e balanza entre material necesario pa biba y entre otro salud cu hende mester pa goza di bida, tabata e tema di e simposio na cual Su Alteza Princesa Beatrix tabata presente y cu nos ta aplaudi!
Sin duda, medidanan cu actualmente gobernantenan di Gabinete Wever-Croes ta introduci y relatonan informativo cu nos ta produci, ta haya mas sosten cerca Pueblo na caminda pa e punto decisivo den bida di cada ciudadano, tan necesario den e peligroan produci pa cambio di clima.
