Magaly Brito, Secretario General SEPPA:
- Pa evita cu e aparato publico keda bashi di conocemento y experiencia
ORANJESTAD (AAN) Den entrevista cu DIARIO, señora Magaly Brito, Secretario General di Sindicato di Empleadonan Publico y Priva (SEPPA), a reitera cu tin un cantidad di ambtenaar cu suficiente experiencia y conocimento cu, of ta opta pa bay cu vut, of ta baha cu pensioen. Di hecho, hopi pensionado lo baha di gobierno, entre aña 2025 y 2030.
Magaly Brito ta expresa cu lo tabata ideal si a cuminza prepara e hobennan cu ta den servicio pa traspasa pa nan e informacion cu esnan cu lo baha for di gobierno tin acumula, di tal manera cu nan por continua cu e servicio y, hasta, mehora esaki, naturalmente.
Esey lo mester ta parti di e plannan cu tin aworaki tambe, pa asegura cu e aparato publico keda bashi di experiencia y conocemento, pa por hiba e departamentonan pa dilanti.
“Nos ta kere den servicionan publico di calidad, y cu p’esey mester tin suficiente personal, mi ta kere cu mester prepara nan, y nos ta kere cu mester tin traspaso di informacion y conocemento. Tecnologia semper ta forma parti di eficiencia pero nunca e por reemplaza e ser humano. Na Aruba nos hendenan tambe tin derecho di biba y desaroya nan mes, etc., pero nunca e tecnologia por reemplaza hende”, Secretario General di SEPPA a enfatiza.
