Partido di Wilders lo haya Secretario di Estado Asuntonan di Interior
*Futuro Secretario di Estado pa Relacionnan den Reino desconoci
*Futuro Encargdo di Digitalisacion di van Huffelen tampoco ta conoci
ORANJESTAD (AAN) — Cual ta e partidonan cu lo a forma Gobierno di Hulanda y asina bira e base di Gobierno di Reino, tabata un hecho for di momento cu e resultadonan di eleccion a bira conoci.
Ya prome cu e resultadonan mes tabata conoci, mundo henter a wordo sorprende pa e sosten enorme cu Pueblo di Hulanda a entrega na Geert Wilders, cu na Aruba no ta un figura desconoci y cu tambe ta conoci cu e pais, cu el a bishita den pasado.
Por considera Geert Wilders un nacionalista di berdad, a base di su promesanan na Pueblo Hulandes cu e lo crea un Hulanda pa e Hulandesnan, cu mester ta normal pa un politico enfrente su pais, pero sumamente delicado na e forma cu el a wordo presenta pa Wilders.
Pa Aruba tabata sumamente importante pa tuma nota, kende lo bira Ministro encarga cu e asuntonan cu te awor ta encargo di Ministro Hugo de Jonge, pero ta wordo atende pa e Secretario di Estado pa Relacionnan den Reino, a keda desconoci.
Pa atende cu kende lo ta encarga cu e Relacionnan den Reino mester cuminsa splica cu e pakete di loke por spera pa Relacionnan den Reino di parti di e Gobierno nobo, a keda un tanto misterioso cu excepcion di palabranan di amenaza serio di parti di Geert Wilders mes, pero den e tempo cu ainda e no a bira ganador di eleccion.
Ayera, manera Aruba mester spera, na momento cu nombernan di Ministronan y Secretarionan di Estado a cuminsa aparece den publicidad, DIARIO ta en busca di e reemplazante di de Jonge pero tambe sigur di Alexandra van Huffelen.
Pa comprende bon di kico ta trata, mester realiza cu for di 1998 e Ministerio di Asuntonan di Interior di Hulanda, a bira e Ministerio di Asuntonan Interior y di Relacionnan den Reino.
E Secretario di Estado, cu ta resorta tambe bou “Binnenlandse Zaken en Koninkrijksrelaties”conoci como BZK, tambe tabata tin mes titulo te na momento cu Alexandra van Huffelen a haci su entrada como Secretario di Estado pa Relacionnan den Reino y Digitalisacion, manera e tabata presenta su mes tambe na mundo.
Kico ta pasa awor? No por topa ni cu Secretario di Estado pa Relacionnan den Reino ni pa Digitalisacion.
Esaki ta nifica cu automaticamente lo cay bou Ministerio di Asuntonan Interior y e Secretario di Estado di Asuntonan Interior manera antes tabata e caso?
Si esaki ta e caso, e partido nobo NSC ta haya e Ministerio di Asuntonan Interior y e Partido di Geert Wilders, lo participa na gobernacion como Secretario di Estado di Asuntonan di Interior. Esaki lo haci cu Asuntonan di Reino tambe lo ta parti di nan tarea?
Kico a pasa cu e encargonan di Alexandra van Huffelen?
Ayera e prome informacionnan a mira luz mientras awor mester mira con cada candidato pa gobernante di Hulanda y Reino ta pensa di duna contenido na su funcion.
Kico lo pasa cu Asuntonan di Reino, mester bira conoci mescos cu plannan concreto cu lo ta base di Gobierno di Reino!
