ORANJESTAD (AAN): Ya for di luna pasa caba, por a nota cu e area cu tin mey-mey di e dos partinan di Car Rentals net pafo di Terminal di Aeropuerto a wordo cera pa asina construccion tuma lugar.
E siman aki, oficialmente gerencia di Aeropuerto a divulga cu aki ta unda nan tin e proyecto nobo di AAA NV cu lo ta pafo di Terminal. Nan ta desaroyando un area nobo di bende cuminda.
E asina yama ‘Food Court Area’ aki ta situa net otro banda di e Sala di Yegada di Aeropuerto, y lo bay ofrece un experiencia conveniente di cuminda local delicioso pa tanto pasaheronan cu ta yega, pa esnan cu ta bishitando Aeropuerto, y empleadonan.
DIARIO a nota cu e diseño ta incorpora algun parkeo pa staciona Snacktrucks tambe, cu ya a bira algo ‘tipico’ di Aruba. Lo tin espacio pa sinta come tambe.
Segun e deal traha cu contratista, e proyecto aki ta programa pa keda cla den e di dos cuartal di 2025.
