Un logro pa nos comunidad como e prome na Aruba
ORANJESTAD (AAN): Riba 12 di december 2024, Centro di Memoria ta celebra un logro hopi special, esta 10 aña di existencia y dedicacion cu e meta pa mehora e cuido pa tur cu tin deterioro cognitivo na Aruba. Loke a cuminsa na 2014 como un ambicion di un grupo di specialistanan pasiona, a crece y a bira awendia un clinica di memoria indispensabel pa nos isla.
Centro di Memoria a habri su portanan oficialmente na 2014 danki na un colaboracion unico entre Horacio Oduber Hospital (HOH), SABA y Cas Marie como e prome y unico clinica di memoria na Aruba. Cu un team multidisciplinario di specialistanan di cuido pa adulto mayor, internistanan, un neurologo, un psicologo, secretaria y un casemanager, ta ofrece diagnostico y guia pa pashentnan cu deterioro cognitivo. Banda di malesa neurodegenerativo, ta investiga, trata of señala tambe otro causa di problema cognitivo.
Durante e ultimo 10 añanan, e team dinamico di Centro di Memoria a yuda cu hopi orguyo aproximadamente 2100 pashent. Aña pasa a conoce un aumento notabel den registracion, cu ta indica e urgencia y importancia di nan trabou. Y ta anticipa cu esaki lo bay aumenta mas ainda den futuro.
E 10 aña di existencia di Centro di Memoria ta un momento pa para keto y reflexiona riba e gran impacto cu Centro di Memoria tabatin durante transcurso di aña, pero alabes pa enfoca y mira e oportunidadnan cu tin pa futuro. Cu un dedicacion sin fin, e team siguramente lo sigui pusha pa mehora e calidad y e cuido pa nos pashentnan cu deterioro cognitivo na Aruba.
Hunta di Directiva, Management y staff di HOH ta felicita e team completo di Centro di Memoria cu nan 10 aña di dedicacion y excelencia den cuido di memoria!
Pabien Centro di Memoria y Pabien Aruba!
