Magaly Maduro, directora di Bureau Sostenemi:
ORANJESTAD (AAN): Señora Magaly Maduro, directora di Bureau Sostenemi, a referi, den entrevista cu DIARIO, na violencia y maltrato di mucha, cu a wordo celebra Diamars di e siman aki, dia 10 di December. Esaki tabata e dia 16 di e campaña di concientizacion y señora Maduro a subraya cu e no mester keda 16 dia so, pero henter e aña. El a señala cu maltrato di mucha na Aruba ta alarmante.
Maduro a elabora tocante muchanan cu ta wordo maltrata door di hende muher.
“Esaki ta hopi interesante; mi a mira e aspecto tambe door di maltrato. Tin maltratonan severo contra mucha, y esaki ta alarmante”, Maduro a menciona.
Esaki ta debi na un combinacion di tur cos. “E tin di haber cu un comunidad cu ta hopi violento, e patriarcado unda hende homber ta pensa cu nan ta bal mas cu hende muher. E ta den nos cultura, e ta den nos region di Latinoamerica y Caribe unda hende muher ta wordo mira como menos y, lamentablemente, nos no ta kibra e imagen aki”, Magaly Maduro a señala.
Magaly Maduro ta kere den educacion den tur front pa cu e tema aki. El a reitera mester haya atencion durante henter e 360 dianan di aña pa bisa NO na violencia, NO na violencia contra hende muher, NO violencia contra mucha.
“Esey ta un decision cu personalmente nos mester tuma, gobierno mester kier pa esey, y mester pone placa unda cu ta necesario pa haci e campaña aki, conhuntamente cu nos sociedad, pa nos por logr’e”, Magaly Maduro a señala.
Maduro a bisa cu como Bureau Sostenemi nan ta traha pa e menornan pero, en general, tin un plan nacional pa lanza, y eyden tambe e sector di husticia ta wordo duna hermentnan pa traha cu ne.
“Si boso nan kier drecha mester traha cu cierto cosnan, y sigur esaki a wordo atendi; kiermen, ora un victima ta bay na Polis, y bo no a wordo trata manera mester ta, bisa cu ‘abo mes a busca’, ‘bo tabata kier’. Pues tin diferente punto cu sigur husticia mester traha riba dje”, Directora di Bureau Sostenemi a bisa.
El a indica cu riba e parti di salud tambe. “Ora cu bo yega y bo ta maltrata, mester opvang’e bon, mustre unda e por haya ayudo, encurash’e pa haci denuncia, mustre na unda e por haya ayudo, pasobra, por ehemplo tin un Fundacion pa Violencia Relacional, y tin hende cu no sa cu e ta existi, pero tin mas cu 30 aña di existencia. Kiermen, nos conhuntamente so, por ataca e problema aki.
