Aerolineanan ta considera Aruba como e 'Rock Star'

Exitoso Routes World 2022 pa Aruba Airport:

ORANJESTAD (AAN):  No ta un ni dos, sino varios aerolinea participante den e foro mas importante na mundo pa topa cu aeropuertonan a afirma n’e delegacion di Aruba Airport cu “Aruba ta un rock star”. Ta considera Aruba un berdadero ehempel den Caribe pa cu recuperacion despues di pandemia. E habilidad demonstra door di tur partner envolvi na Aruba pa traha hunto pa progreso y desaroyo di nos producto turistico ta bisto pa henter mundo y e demanda pa Aruba ta keda grandi.

            E evento World Routes t’e punto culminante anual cu ta proporciona un plataforma unico p’e profesionalnan di desaroyo di ruta, tanto di aeropuerto como di aerolinea pa por discuti, desaroya y planifica strategia di ruta. E plataforma aki ta presenta oportunidad ilimita di negoshi y di creacion di red door di reuni e aerolineanan principal, aeropuerto y autoridad turistico, pa proporciona asina un plataforma eficaz cu ta spaar costo y tempo n’e organisacionnan cu ta desea pa desaroya y amplia nan red di ruta.

            Aruba Airport Authority N.V. (Aruba Airport) hunto cu mas di cien aerolinea, otro aeropuerto y organisacion di turismo di rond mundo a asisti recientemente e di 27 Conferencia di e Forum Mundial di Desaroyo di Ruta na Las Vegas, Nevada, representa pa Barbara Brown, Chief Commercial Officer y Jo-Anne Meaux-Arends, Air Service Development Manager.

            E conferencia tambe a brinda oportunidad pa reuni personalmente cu varios di e proveedornan di aeropuerto di Aruba, cu ta sostene y ta forma parti di diferente actividad di desaroyo di servicio aereo na aeropuerto. Tabatin hopi oportunidad pa construi e rednan actual y presenta posibel socio comercial nobo pa Aruba Airport. E demanda pa Aruba traslada den e asina yama “forward bookings” pa e temporada di winter nos dilanti ta mustra sumamente positivo basa riba e informacion comparti door di e aerolineanan existente.

            E sector di aviacion ta creciendo rapidamente y lo sigui crece. Aeropuerto di Aruba a tene un total di 22 reunion, parti den tres dia di negociacion, di cual 10 ta inclui oportunidad nobo p’e transporte aereo di Aruba fo’i Latino America, Canada, Europa y Merca pa aña 2023 y mas leu. E ekipo di AAA a reuni cu aerolinea existente manera British Airways, KLM, American Airlines, Jetblue, Delta Air Lines, United Airlines, Avianca y Copa Airlines.

            E aerolineanan cu ta interesa pa lansa of aumenta e rutanan di negoshi of vakantie, crea oportunidad nobo y interesante pa Aruba ta por ehempel Equair, Breeze, Azul y Flair Airlines.

            “E enfoke mas flexibel y di colaboracion pa traha cu e aerolineanan a duna su fruto,” segun Jo-Anne Meaux-Arends a afirma, señalando cu e tecnicanan pa capta e oportunidadnan aki ta inclui exploracion di e retonan competitivo fundamental na esunnan cu e aeropuertonan chikito ta confronta pa wanta of mehora e servicio aereo comercial. “E tecnicanan nobo di recompilacion di data, hunto cu e datonan historico di e demanda global y e capacidad dje sector, ta uza pa pronostica e demanda di forma eficaz, incluyendo ora cu e resultadonan dje aña anterior ta menos representativo.”

            “E futuro dje aeropuerto di Aruba ta mustra briyante,” segun Barbara Brown ta afirma. “Nos ta sigui enfoca pa crea experiencia aeroportuario agradabel y autentico pa nos aerolineanan, nos pasaheronan y e comunidad aereoportuario en general, haciend’e di e manera mas sostenibel posibel.”