Ademas di accion sindical den diferente instancia publico trahadornan a para trabao

ORANJESTAD (AAN) – Varios sindicato a tene accion di protesta Diaranzon, manera lidernan sindical a bin a anuncia pa algun dia caba, y manera por a haya sa via media,

Prome Minister Evelyn Wever-Croes a bolbe haci un yamada pa dialogo mirando cu Diabierna di e siman aki, tin reunion di Ministerraad di Reino, y su intencion ta pa conhuntamente (gobierno y sindicatonan) debati cu Hulanda riba e tema tan conoci di e 12.6%.

            Minister Presidente a bisa cu “tempo ta cabando” pero diferente sindicato ta bisa cu  pa nan “e tempo a caba varios dia atras caba”.
            Fuera di e accion sindical, den algun departamento di gobierno e trahadornan a realiza un accion silencioso, kedando mey ora sin mishi un computer, sin atende telefon, etc., y despues e trabao a sigui den accion morocoy.

            Y por a compronde tambe cu trahadornan di AZV a para trabao como tambe ANSA na Aeropuerto, entre otro. Pues bon por bisa cu den mayoria di sector publico, na un of otro manera, trahadornan a mustra nan disgusto y nan no ta dispuesto pa sigui entrega e 12.6% di nan salario.

Riba potret por mira algun trahador di Casa Cuna, Sociale Zaken y WEB.