Oposicion y Coalicion ta uni pa gasta placa di Pueblo na Europa --- Cuanto placa Aruba mester paga pa presencia na Congreso? --- Biahe di Miembronan di Parlamento ta un abuso contra Aruba
ORANJESTAD (AAN)- E temporada di fiesta 2021 ta destaca su mes pa e hecho cu sindicatonan di Gobierno a menasa cu accion.
Un accion cu no a stroba un grupo importante di Miembronan di Parlamento pa biaha pa Hulanda caminda nan ta participa pa un congreso anual cu tin nomber di Inter Expo.
Ta tristo cu mientras tur atencion di Pueblo di Aruba ta wordo exigi dor di union di sindicatonan cu no kier pa baha nan salario, un grupo importante di Parlamento di Aruba ta biaha pa Hulanda pa participa na un congreso y un asina yama mision comercial.
Tur atencion di Aruba ta riba e accionnan di sindicato, cu no a bay aeropuerto pa despedi di e grupo forma pa Miembronan di Coalicion y di Oposicion, cu awor si a haya otro den e biahe pa Hulanda.
Ta increibel y lamentabel cu hendenan cu ta wordo paga pa sirbi Pueblo, den e situacion cu Aruba ta actualmente ta subi avion pa bay Hulanda.
Ora scucha debatenan importante den sala di Parlamento, por tuma nota con oposicion ta ataca coalicion y Gobierno,
Pero awor si tur por ta hunto den avion pa bay Hulanda pa atende na un mision comercial y un congreso den cuadro di desmantelacion di Antia Hulandes.
Ta increibel pero berdad, cu un grupo cu ta representa mas o menos mita di Parlamento di Aruba, ta uza placa di un Pueblo den problema serio pa loke nan a bay haci.
Awe Marisol no ta papia di spirito. Awe Miguel Hose no ta puntra kende tin Hogere Beroepsopleiding.
Awe tur hende ta hunto pa fiesta na Hulanda cu placa di Pueblo.
DIARIO conoce e evento Inter Expo cu ya a cumpli 31 aña. No tabata tin necesidad pa un grupo grandi di Parlamento a bay, sigur si tene cuenta cu Aruba tin un Ministro Plenipotenciario y un Arubahuis ekipa pa e tipo di eventonan aki.
Kico Aruba mester paga? Kico Pueblo di Aruba mester pone riba mesa?
Placa pa transportacion di Aruba pa Hulanda. Placa pa hotel. Placa pa transportacion pa tur evento. Placa pa tur miembro di delegacion luci bunita.
Aruba mester pone placa riba mesa pa nan come y nan bebe na restaurantnan cu normalmente hende no ta bishita si nan mester pone nan propio placa riba mesa.
Ta increibel cu no tin protesta contra loke Parlamento ta haci cu Pueblo.
E personanan cu a wordo eligi pa representa Aruba den defensa di e pais, awe ta uni na Hulanda pa un congreso cu nan no mester a bay.
Awor pakico nada lo pasa? Pasobra awor si nan a uni. Awor si nan por cu otro.
DIARIO ta rechasa loke ta pasa. Na e momento aki Aruba no tin placa.
Pobernan ta lucha pa pasa nan Pasco. Aruba ta den turbulencia. Pero Miembronan di Parlamento a pasa dianan dushi na Hulanda!
No bini cu storia di loke claramente ta un abuso y prueba di oportunismo politico di personanan cu mester busca bienestar di Aruba!
