Acusacionnan infunda riba Social Media a finaliza te den Corte di Husticia

Acusacionnan infunda riba Social Media a finaliza te den Corte di Husticia

Empresario Ishwar Daryanani a entrega keho

ORANJESTAD (AAN):  Awendia bo ta haya hopi hende cu ta ser yama “keyboard warriors”, esta cu nan ta sinta patras di un computer of smartphone, y ta publica riba Social Media un monton di disparate, mentira, storia yen fabula, cu e meta pa difama cualkier persona of instancia.  Pero e isla aki ta uno di derecho, caminda bo no por haci esey sino bo ta hayabo envolvi cu husticia.

   Mas di tres aña pasa, diripiente for di 3 diferente skina a cuminza sali riba social media algun storia asombroso contra e empresario local Ishwar Daryanani.  Storianan encuanto un ex-empleada cu no a haya su pago, demas storia di su famia, y tambe relatonan inventa encuanto su yiunan.  DIARIO a tuma nota di e sentencia di Hues publica riba e social media di Daryanani.

   Como cu e storianan aki no ta basa riba nada, y danki na e hecho cu Daryanani ta bon documenta cu tur documento di pago, y di banco, el a acudi na Ministerio Publico pa haci denuncia di difamacion.  El a mustra Ministerio Publico cu e hecho cu diripiente 3 diferente persona ta publicando e mentiranan casi similar aki, ta un indicacion cu ta un complot tin contra dje.  Siendo cu e tin tur papeleo preto riba blanco encuanto e ex-trahador femenino aki di nacionalidad Venezolano.

    Pero e persona cu tabata lanta hopi calumnia ta un homber identifica como Henry David Nuñez Bahamón (pareha nobo di Ishwar su ex-casa), y pa tal motibo e denuncia a wordo haci contra dje.

   Tur esaki a culmina recien den Corte di Husticia, unda cu Ishwar Daryanani a presenta dilanti Hues riba su mes, y Henry Nuñez a bin representa pa abogado mr. Odor.   Di e forma ey den Corte a pone un paro final na e conflicto aki, y tanto Daryanani y Nuñez Bahamón a firma un acuerdo, esta cu nan lo no publica cos di otro mas riba social media.  E areglo aki a wordo anota  door di Hues oficialmente.  Durante e caso dilanti Corte di Prome Instancia, Henry Nuñez Bahamón a firma e acuerdo, declarando cu tur loke a publica den social media no tabata berdad.

   Si acaso esaki no wordo respeta, pues si acaso Nuñez Bahamon bolbe publica cos contra Daryanani, e ora lo tin di paga 5.000 Florin na e otro persona.

   A admiti cu tur e acusacionnan lanza riba Social Media no ta cuadra, y ta lamenta esey.  A sali na cla cu e background di e acusacionnan aki tabata mas bien di caracter personal.  Pues na final, cada uno tin di carga e gastonan di e procesonan di e caso aki.

   DIARIO a puntra Daryanani su opinion riba e caso aki, y el a declara cu e no tin ningun comentario pa bisa.  A puntr’e encuanto e castigo di 5.000 Florin si acaso Henry Nuñez Bahamón bolbe publica algo riba social media, el a bisa cu cualkier persona cu descubri un of mas atake nobo di Henry riba social media y duna tip encuanto esaki, e placa ey di 5 mil Florin lo wordo entrega na e tip-gever como ‘recompensa’.

   Pero e caso aki ta demostra claramente cu awendia ya bo no por uza Social Media pa ataca kende cu ta riba e isla aki.  Corda cu e reglanan di ‘Smaad en Laster’ ta aplicabel aki.

   Ishwar Daryanani ta maneha varios media na Aruba, incluyendo e corant Amigoe y tambe Aruba Tourist Channel.  E potret aki di DIARIO di Daryanani a wordo saca recien na un actividad comercial.