Uno di e aeropuertonan di transito mas importante di Europa
- Advertencia DIARIO pa menasa serio ta bolbe resona awe
- Aeropuerto Schiphol di 12 pa 0 vuelo durante anochi na bista
ORANJESTAD (AAN)- Na un forma progresivo e cantidad di vuelonan entre Aruba y Hulanda a conoce aumento cu un aporte enorme pa e sector di turismo di Aruba, cu a adapta su mes tambe na exigencianan di e turista Europeo.
Durante basta tempo DIARIO ta bati alarma pa e resultadonan grandi cu medidanan Hulandes relaciona cu cambio di clima lo tin pa Aruba.
Central den e medidanan aki ta e forma cu aviacion ta afecta clima loke ta nifica cu e cantidad di vuelonan pa Schiphol mester wordo reduci.
No ta clima so ta e problema di Schiphol, cu a bira un punto economico sumamente importante pa Hulanda pero tambe un problema grandi pa e miembronan di poblacion Hulandes den vecindario di e aeropuerto Schiphol.
Pa Aruba ya viahenan pa Hulanda ta un garantia basa riba e trafico enorme entre e islanan Hulandes den Caribe y pais madre Hulanda, cu a bira e punto di contacto cu Europa pa e Arubiano y pa cantidad di habitantenan di paisnan cu ta descubri Europa.
Baha e cantidad di vuelo pa y di Schiphol, ta uno di e puntonan riba agenda di Gobierno di Hulanda, cu a wordo confronta cu resistencia di parti di gerencia di Schiphol, cu ta splica e resultadonan dramatico cu menos vuelo pa Schiphol lo tin pa mundo di viahe y pa turismo pa Europa.
Ora papia di e aeropuerto di Schiphol, ta papia di uno di e seis aeropuertonan mas grandi di Europa y sigur uno di e aeropuertonan mas grandi pa transito di pasahero.
Sinembargo, no por descarta e papel enorme cu carga ta hunga pa e aertopuerto internacional Hulandes, cu lo conoce medidanan cu lo afecta Aruba tambe na un forma serio manera DIARIO a ta adverti pa basta tempo.
Na momento cu cada rato cifranan mas significativo ta mira luz pa loke ta trata turismo y asina trafico aereo entre Aruba y Hulanda, informantenan ta splica cu e momento a yega pa dedica atencion na un forma specifico na e impacto enorme cu medidanan riba e tereno aki, lo tin pa Aruba.
Mientras Aruba ta prepara pa e conferencia di clima organisa pa Gobiernonan di Aruba y di Hulanda, informantenan ta di opinion cu gremionan tambe mester cuminsa atende cu e realidad, cu lo tin resultado grandi pa Aruba.
Menos vuelo lo afecta prijsnan cu lo subi loke tambe ta incalcula como uno di e formanan pa baha e cantidad di vuelo, ya cu menos vuelo ta nifica prijs mas halto, cu lo afecta e cantidad di pasahero cu lo viaha pa Hulanda y Europa tambe.
Pero kico resultado di esaki lo ta? Informantenan ta entrega un macuto di aspectonan cu mester tene na consideracion.
E turista Hulandes y Europeo cu a cuminsa descubri Aruba y asina e resultado pa economia.
Schiphol ta representa un porciento di e economia Hulandes. E efectonan secundario pa viaheronan pa y for di Aruba cu ta haci uzo di Schiphol, mester wordo tene na consideracion.
E conferencia di clima na Aruba sigur ta aporta cu un demanda nobo pa cuminsa atende cu realidadnan mundial cu hende pa un motibo of otro no kier realisa.
DIARIO ta keda conecta na fuentenan sumamente valioso di informacion riba clima y e resultadonan cu lo impacta hasta e forma cu un grupo importante, ta biba entre Hulanda y Aruba pa medio di viahenan constante, cu lo afecta comercio, turismo, economia pero hasta e forma cu famia ta keda den contacto, asistencia di dokter ta wordo busca y Florin ta lora den negoshi cu ta wordo haci a base di e comunicacion aereo entre Europa y Aruba.
Si plannan wordo ehecuta, aeropuerto Schiphol lo cera su porta pa e pro medio di 12 vuelo anochi cu ta wordo registra actualmente pa 0 vuelo anochi! Cifra cu ta papia pa su mes y ta urgi pa tur hende y instancia habri nan wowo.
