Prijs di petroleo ta afecta prijs di rubber sintetico pa tire --- Produccion di tire ta depende 60 porciento riba petroleo --- Tire ta prueba di e retonan grandi tras di cambio di clima
ORANJESTAD (AAN)- “2022 lo bira un aña di cambio. Mientras Omicron ta causa mas inseguridad, ya tin asuntonan cu gremionan mester atende cu nan miembronan.”
Expertonan riba tereno economico y financiero a mustra DIARIO, cu desaroyonan ta haci cu Aruba no ta wordo bon informa di tur loke e futuro directo lo trece.
E aumento mundial di prijs ta un asunto cu segun informantenan mester wordo bon presenta na publico.
Hopi sector ainda no ta realisa kico ta spera den futuro y con directamente of indirectamente e costo di bida pa tur hende ta wordo influencia.
Un sector cu mester wordo bon prepara na Aruba, manera a bini dilanti, ta transportacion di cual un cantidad grandi di hende ta depende.
Te awor e atencion mas importante ta riba e prijs di gasolin cu cual den cierto sentido por hunga politica, manera a keda demostra algun dia pasa ora un grupo di simpatisante di oposicion a bay protesta contra prijs actual di gasolin cu no ta den man di ningun hende na Aruba.
Mientrastanto transportacion ta bira e problema mas serio den tur comunidad cu a ahusta nan mes na tempo moderno.
Transportacion ta depende di vehiculonan, cu ta wordo produci den un situacion mundial sumamente dificil y den cual hopi asunto cu mester ta na claridad, ainda ta desconoci.
E prijs di tire ta un prueba di esaki.
Informantenan a mustra cu hopi hende no ta para keto na e resultadonan mas complica di Covid-19 y di e problemanan petrolero.
Petroleo ta necesario pa produccion di por ehempel tire, cu mester di rubber. Cifranan ta indica cu e rubber cu ta uza pa tire pa 60 porciento ta consisti di rubbel sintetico cu tin petroleo como base. Resto di 40 porciento ta di rubber natural di mata, cu tambe ta subi den prijs debi na e efecto di rubber sintetico.
Rubber a bira importante durante e pandemia tambe debi na su uzo pa handschoen por ehempel.
E cantidad di producto cu ta wordo traha cu rubber sintetico, ta haci cu ora prijs di petroleo subi, nan prijs tambe ta subi.
“Ta papia di auto electrico. Pero e auto aki tambe tin tire y mester mira con ta bay traha e tirenan aki sin petroleo. E rubber sintetico ta haci e tire mas fuerte y e auto electrico ta mas pisa y mester di tira mas fuerte,” a wordo mustra.
Recicla ta bira epalabra importante riba e tereno aki tambe, pero publico mester ta prepara pa e loke e aumento di tire y produccion general di vehiculo ta sigui nifica pa transportacion, segun informantenan.
E cambionan grandi cu por spera na 2022 sigur ta haci necesario pa organisacionnan y gremionan prepara nan miembronan y publico general debidamente, pasobra ta diferente factor cu ta mishi directamente cu prijs lo tin influencia pisa.
Finalmente mester tene cuenta cu e spiral di inflacion cu den e asuntonan aki cu ta parce di menos importancia ta bini dilanti. Cada prijs cu subi ta haci bida mas caro y ta forma e spiral peligroso pa economia y bienestar di un pais.
