Otmar Oduber encuanto scarcedad di trahado:
ORANJESTAD (AAN): Ex-Ministro Otmar Oduber, kende awor ta forma parti di Plataforma Nos Pais, a splica na DIARIO cu e ta di opinion cu na e momentonan aki tin areanan cu tin mester di trahadornan y ta considera cu si un adulto mayor ta sinti y desea cu e por sigui traha despues di a yega edad di pension, mester por adapta e leynan pa permiti esaki.
Un ehempel di esaki ta maestronan di scol, kendenan debi na e ley, ora nan yega edad di pension, na ta obliga di bay cas, siendo cu nan lo por tin e deseo y capacidad pa sigui traha pa 5 of 10 aña mas.
“Mi ta kere cu nos mester duna e oportunidad na nos grandinan, pa esnan cu tin experiencia, sigui traha te unda cu nan por y desea,” Oduber a bisa.
El a sigui declara: “Logicamente mester parkeer nan pension un rato y por duna nan hasta un bonus na e ratio di e pension cu nan no a cobra, ya cu nan lo sigui biba cu nan salario, cual ta un entrada mas halto”.
Otmar ta expresa cu tin hopi hende fuerte cu por sigui traha, mas aun si tene na cuenta e cifranan cu a bin dilanti durante conversacionnan sosteni cu OPPA, cu ta indica cu 1 di cada 4 adulto mayor na Aruba ta biba den pobreza, cual ta algo inacceptabel.
