ORANJESTAD (AAN): Manera por corda, tabata riba un Diabierna mainta cu comunidad a spierta y descubri cu e Monumento di Tortuga riba Irausquin Boulevard net panort di Amsterdam Manor,
cu ainda no a wordo inaugura oficialmente, a wordo susha cu graffiti cu e mensahe ‘No More Hotels’.
Vocero di Polis, Liliana Rasmijn a splica cu den e rapport di Polis ta indica cu Diabierna 29 September den oranan di marduga, un patruya di polis cu tabata na altura di Amsterdam Manor yegando cerca na e rotonde, e agentenan a ripara cu desconocinan a haci graffiti riba e muraya na unda recien a pone e monumento di turtuga.
Ta asina cu Polis di biaha a informa central di polis. Na su turno central di polis tuma contacto cu esnan encarga cu e monumento encuestion.
Recherche a worde poni na altura y na unda a cuminsa di biaha cu un investigacion. Autoridadnan a haci nan trabao, y despues di 12 dia cu e incidente aki a socede, riba Diamars 10 di October, oficialnan di Recherche a detene e homber Nigel A.I. Maduro di 27 aña, di nacionalidad hulandes relaciona cu e caso di destruccion.
Nigel Maduro ta un hoben diploma cu estudionan avanza y cu ta un persona cu ta haciendo su best pa trata na conserva naturalesa y reduci tur e negativismo cu actividadnan turistico ta trece riba medio ambiente, incluyendo animalnan bibando riba tera of marino. Y uno di e pensamentonan di dje ta pa tin menos construccion canto di lama, pues yuda mantene tur cos mas protehi.
Segun vocero policial, nNo ta descarta cu lo por tin mas detencion relaciona cu e caso aki.
Un biaha mas polis ta haci un suplica pa esnan cu sa algo of a wak algo yama e tipline di polis cu ta 111-41.
