ORANJESTAD (AAN) –Durante su presentacion, en ocasion di e lanzamento di 'MiSVb Trahado Mobile App', e director di SVb, Edwin Jacobs, a expresa cu mas of menos cuater aña pasa,
den e mesun sala cu a reuni e bez aki, nan lanza otro Plataforma cu un par di luna despues a comberti su mes den un instrumento, sumamente importante, cu a wordo uza pa Gobierno di Aruba pa asina percura pa trece pan riba mesa, pa trahadornan den tempo di pandemia, mediante e subsidio di salario, pero pa e contribucion di salario pa empresanan chikito y mediano.
Jacobs a señala cu pandemia a causa tambe cu e plannan cu SVb tabata tin, mester a wordo postpone pa un rato; plannan cu ta bin di algun tempo atras. “Ta na Maart 2016, momento cu cierto cambionan di ley a bay Parlamento, ya cu no tabata tin duda mas cu e seguronan di bida existente ta keda seguronan publico, nos a lanza e Vision 2020, cu un aña despues a haya su implementacion”, Ir. Edwin Jacobs a señala.
Director di SVb a sigui splica cu desde cu Minister Dangui Oduber a yega, a apoya e plan aki completamente, pasobra e ta pas completamente cu e vision di e minister, pa digitalizacion di servicio.
“Pandemia a postpone pa un rato; pero pandemia a haci algo sumamente importante, cu kizas bao circumstancianan normal lo a tuma hopi aña pa por a tuma lugar, cu tabata e aceptacion y obligacion di siña traha cu medionan digital.
“Di un dia pa otro tur lugar a cera, nos a haya nos mes obliga cu nos tin cu haci’e. Entre otro, e plataformanan di SVb mes, den e prome lunanan tabata asina dificil pa convence e dunador di trabao pa registra. Pero na momento cu e loonsubsidie a cuminza, e registracionnan a bay y awendia tur dunador di trabao ta registra via ‘Mi SVb’. Asina tambe, e sala aki tabata un sala conoci pa ta yen durante e dianan di siman parti mainta, pa nos trahadornan presenta akinan, pa haya control medico. Control medico a pasa virtual, of via telefon.
Pues pandemia a impulsa digitalizacion di nos sociedad. Di un banda a postpone e plannan cu nos tabata tin, pa loke ta trata e digitalizacion di e seguro di trahado den SVb, pero di otro banda a impulsa cu awendia tin pleno confianza cu pa fin di aña nos tin 85 pa 90% di trahado registra riba nos App Mi SVb, pasobra nos a custumbra cun’e caba”, Jacobs a subraya. El a agrega cu e proximo simannan lo mira SVb tur caminda, pasobra e ta manera un team cu ta bay subi caya di forma sistematico y estrategico pa apoya nos aseguradonan, trahado di sector priva, pa download e app y registra riba dje. “Pues nos lo ta dunando e asistencia ey na nos aseguradonan. E app aki lo duna e trahado loke nunca antes e tabata tin. Na prome e ta bay constata si e ta registra na SVb, pa e dunador di trabao corecto cu e ta traha p’e y pa e salario cu e ta gana. Experiencia den e region ta mustra cu tin paisnan cu a cuminza caba cu e aplicacionnan aki, cu e cantidad di trahadornan registra a aumenta, y e salarionan registra tambe a aumenta pasobra trahadornan a ripara cu no tabata registra cu e salarionan corecto”, director di SVb, Edwin Jacobs a subraya.
El a conclui bisando cu, cu e aplicacion aki, SVb ta dunando contenido na un di e balornan cu e ultimo 20 añanan Sociedadnan ta pidi mas y mas cu ta transparencia y acceso na nan informacion.
