ORANJESTAD (AAN) -- Manera a comenta prome, den entrevista cu don Mario Carrera, e tabata piscado te ora el a haya un accidente,
brindando ayudo na un persona unda asbesto a kibra riba dje kibrando 4 disco di su lomba. El a bay hospital y a keda interna un aña largo y docter a declar’e paralitico pa resto di su bida.
Prome cu el a pasa den esaki el a drenta den depresion door di stress na su trabao di 10 aña den un hotel. Dia 3 di October el a haya e accidente cu a hibe na un estado di depresion mas fuerte, el a perde gevoel pa tur cos, y incluso FE den Dios. Door di un mensahe cu el a haya di su tata, biba na Venezuela, su situacion a cuminza cambia. Su tata a bis’e “Cu e Sanger di Dios Misericordioso esaki ta sana!” don Mario a conta nos.
“Mi tabata hayando masashi cu un Fisioterapista, pa mi keda riba cama pasobra el a bisa mi cu nunca mas lo mi por cana. Mi a bise ‘awe mes lo mi cana’ y cu e ta bay mustr’e. El a contesta mi ‘e ta bao bo riesgo’. Doctor Vallejo a trece mi un corset pa mi bisti. E fisioterapista a pone mi e corset y nada a draai pa mi; ni biramento di cabes ni nada mi a sinti. Mi a lanta foi cama y dun un stap. E fisioterapista a bin cu e docter di piso y e enfermera, y a puntra mi kico mi ta haciendo y mi a contesta cu mi ta cana awe. Docter a bisa cu mi no lo no por cana nunca mas! Mi a cana un par di step mas y nan a puntra mi ta ken a haci esey pa mi, y mi a bisa nan Jesus Cristo. Docter y enfermeranan a yora y a aplaudi”, Mario Carrera a relata.
El a sigui cana poco, poco, y despues di un aña e Docter Hulandes a mand’e Colombia pa e opera. Mario a bay Bogota, unda e specialista cu a trate a bise cu e no por haci nada mas p’e. “Ami cu mi yiu a yora hopi, pero despues e docter a bin bisa mi cu e tin un plan B pa mi. Esaki tabata un tor scruf y dos plaket di titanium cu e ta bay pone mi. Despues cu el a opera mi el a bin puntra mi ta cuanto clabo Jesus Cristo a haya y mi a bie tres. Anto e docter a bisa mi ‘mi a pone bo 12’. Eynan terapia a sigui cana te cu awe. Cu dolor si, pero mi tey!” Mario Carrera a conclui.
