Activacion di e Sistema de Alerta Trempan ta representa un logro historico den e strategia di maneho di desaster na Aruba

ORANJESTAD (AAN):  Crisis Management Office Aruba (CMO) a realisa un ceremonia oficial diahuebs 20 di maart 2025 na Sasaki,

marcando e activacion di e Sistema di Alerta Trempan (EWS) di Aruba. E avance aki ta representa stap grandi den e esfuersonan di preparacion y resiliencia na emergencia riba e isla.

            E ocasion a reuni funcionario clave y socio involucra den e desaroyo di e Sistema di Alerta Trempan. Director di CMO, Eurico 'Rino' Hermans, hunto cu Prome Minister Evelyn Wever-Croes, Jeff Whattam di CentrAlert, Daniela Stoyanova di RESEMBID y Humphrey Vrolijk di DEACI, a devela un plakkaat conmemorativo cu ta marca e activacion oficial di e sistema.

            Na e ceremonia a asisti mandatario, hefe di diverso entidad publico y partinan interesa cu a fungi un papel fundamental den e realisacion di e proyecto aki. Edward Turvill, Gerente Senior di e Programa di Resiliencia di RESEMBID, a elogia e esfuersonan colectivo di e comunidad di respuesta na emergencia di Aruba, afirmando:

            "Henter e ekipo di CMO y tur e partinan interesa involucra den e esfuerso aki merece reconocemento. Aruba ta destaca como un lider entre e Pais y Teritorio di Ultramar den Caribe, logrando un progreso significativo den un corto periodo di tempo. E logro aki ta demostra e compromiso di Aruba cu resiliencia y desaroyo sostenibel."

            E Sistema di Alerta Trempan ta diseña pa fortalece e capacidad di Aruba pa detecta y responde na posibel menasa, garantisando cu e alerta ta yega na tempo na publico y e agencianan al caso. Danki na e colaboracion di CentrAlert, RESEMBID, Union Europeo y experto local, e sistema ta desaroya cu tecnologia avansa pa duna comunicacion inmediato y confiabel den tempo di crisis.

Prome Minister Evelyn Wever-Croes a enfatisa e importancia di e responsabilidad comparti den preparacion pa emergencia. Den su discurso, a destaca cu preparacion pa desaster no ta djis responsabilidad di gobierno, pero cu cada ciudadano mester asumi un rol activo den informa y educa su mes riba con pa reacciona na un emergencia.

            Despues di e ceremonia di develo, a realisa e simulacro anual di emergencia Caribe Wave, coincidiendo cu e activacion di e sistema. Mas di 75 institucion publico y priva a participa den e ehercicio, ehecutando su respectivo plannan di emergencia y evacuacion. E simulacro regional di preparacion pa tsunami, cu ta tuma luga riba e di tres diahuebs di maart, ta un prueba fundamental pa e coordinacion di emergencia y conscientisacion publico.

            Den e simannan nos dilanti, CMO lo hiba un campaña di conscientisacion publico pa brinda informa detaya tocante e Sistema di Alerta Trempan, su funcion y con publico por prepara miho pa un situacion di emergencia. E iniciativa aki tin como obhetivo garantisa cu cada residente y bishitante di Aruba ta bon informa y sa con pa reaccion di manera efectivo den momento di crisis.

            E activacion di e Sistema de Alerta Trempan ta representa un logro historico den e strategia di maneho di desaster na Aruba. Crisis Management Team Aruba ta extende su gradicimento na tur stakeholder, agencia y persona cu a contribui na e esfuerso aki, reafirmando e compromiso di Aruba cu siguridad, preparacion y resiliencia.