En conexion cu tratamento di Presupuesto 2025
*Ta destina 17 miyon florin pa FCCA por traha mas cas social
ORANJESTAD (AAN): Prome cu e reunion pa trata Presupuesto 2025 a tuma luga, Minister Maduro di Finansa a entrega un di dos Nota di Cambio di Presupuesto 2025 na Parlamento, den cual ta hisa e suma di subsidio na FCCA cu 2,7 miyon florin y ta aloca 17 miyon florin pa FCCA por traha cas social.
E ta conoci cu for di basta tempo FCCA tin un reto grandi pa por yega na financiamento na interes reduci pa por traha mas cas social pa esnan mas necesita na Aruba. Tin un lista di espera grandi pa casnan social, pero e reucurso financiero di FCCA no ta yega pa por traha e casnan necesario. Na varios ocasion FCCA a reuni cu Gobierno riba e reto aki pa hunto busca un posibel solucion pa asina por yuda yega na e financiamento necesario pa FCCA por baha e lista di espera di casnan social.
E solucion mas factibel ta pa Gobierno presta FCCA e placa aki pa asina FCCA por traha e viviendanan necesario, locual den pasado a yega di pasa caba. Awo cu Gobierno a traha espacio fiscal y tin surplus, Gobierno por aloca 17 miyon florin pa asina FCCA por haya un fiansa cu ta permiti FCCA cuminsa traha casnan social y hogarnan pa nos grandinan.
E di dos Nota di Cambio cu Minister Maduro di Finansa a presenta na Parlamento ta aloca tambe un subida di e subsidio di Gobierno na FCCA cu 2,7 miyon florin structuralmente pa asina FCCA por sigui tene e prijs abou pa e huurnan di e casnan social. Esaki ta un peticion di FCCA di hopi aña caba y cu awo Gobierno por cumpli cune debi na e espacio financiero cu e surplus ta trece cune.
Minister Maduro di Finansa ta spera cu pronto Parlamento por trata y aproba Presupuesto 2025 pa asina FCCA por conta cu e fondonan necesario.
{gallery}Gobierno a entrega un di dos Nota di Cambio den cual ta hisa e subsidio cu 2,7 miyon florin{/gallery}
