Parlamentario Otami Thomasia di AVP:
ORANJESTAD (AAN) Parlamentario Otami Thomasia a tuma nota di e decision reciente di AZV pa elimina seis remedi den e grupo di “Benzos” for di su lista di cobertura. E tipo di medicamento aki, cu ta regularmente uza pa trata problema manera ansiedad of insomnio, ta conoci pa su potencial di dependencia despues di uzo prolonga.
“Nos mester ta mas consciente y wak si tin otro alternativa pa e remedinan aki; esey ta e pensamento na nivel internacional. E meta ta pa duna e persona un bida mas pleno, creativo y autonomo; no pa limita nan di manera cu nan keda henter dia sin movecion riba un stoel,” segun Thomasia.
E paso aki ta parti di un enfoke mas humano y preventivo, cu ta promove alternativanan saludabel manera deporte, yoga y otro tipo di terapia pa trata e causa di ansiedad y insomnio, en bes di depende constantemente riba remedi. Dokternan di cas tambe lo tuma un rol mas importante den e seleccion cuidadoso ora di receta e tipo aki di remedi. “Nos kier un sistema cu ta cria consenshi den nos profesional di salud y un proteccion real pa nos pashentnan,” el a agrega.
Un preocupacion particular ta e impacto cu uzo di e remedinan aki tin riba nos mayornan. “Nos no por sigui crea un realidad caminda un hende grandi ta ricibi un receta pa drumi y despues nan ta keda pasivo, sin movecion, sin interaccion cu nan nietonan, sin dignidad,” Thomasia a enfatisa. E ta ripiti cu esaki ta un forma di abuso silencioso, y Aruba mester tuma pasonan firme pa preveni y detene esaki.
Durante bishitanan reciente na casnan di cuido, Thomasia a tuma nota di varios preocupacion, entre nan un di e mas urgente: falta di accesibilidad. "Nos no por traha cas pa hende grandi den districtonan unda no tin facilidadnan basico manera supermarket, transport publico of un espacio caminda nan por sinta bou di un gazebo; cu su debido mantencion y cu ta conta cu acceso pa persona cu limitacion manera ramp pa rolstoel y rails pa wanta na dje.
Esaki ta contribui na aislamento y deterioro di nan bienestar," el a indica. E parlamentario a propone idea manera bus cu ta pasa di bes en cuando pa hiba mayornan pa bishita nan amigo na otro districto, promove movemento y union social.
Otami Thomasia tambe a trece e tema di abuso di adulto mayor dilanti di ministerio, unda nan a tene un dialogo constructivo. Nan a trata tema manera autonomia, ley pa cuido na cas y e necesidad di forma un meldpunt pa abuso – un espacio caminda mayornan por, den anonimo, indica abuso fisico, verbal, emocional of negligencia, den cualkier forma.
“Tur hende merece dignidad y amor, pero hende grandi merece esey dobel. Nan a contribui na nos sociedad, nan a lanta nos pais y awor nos responsabilidad ta pa proteha nan, stimula nan autonomia, y ofrece nan un bida digno y feliz den su ultimo fase di bida,” Thomasia a conclui.
