Accion di Bario ta acerca representantenan di pueblo na realidad y necesidadnan di Rancho

ORANJESTAD (AAN): Durante e recorido di Accion di Bario den Rancho, contacto directo cu habitantenan a forma un parti esencial di e mainta.

E bishita a brinda espacio pa tende experiencia, preocupacion y necesidadnan di residentenan, pero tambe pa comparti momento di gratitud y aprecio pa cambionan cu nan ta percibi den nan comunidad.

   Parlamentario Dennerich Kelly a destaca cu un di e aspectonan mas importante di e recorido ta precisamente e oportunidad pa scucha pueblo directamente. Durante e combersacionnan, habitantenan a papia tocante diferente situacion cu nan ta enfrenta den bida diario, entre otro asunto relaciona cu salubridad, scol y otro necesidadnan den comunidad.

   Segun Kelly, e contacto directo ta permiti pa comprende miho kico ta biba bou di habitantenan y kico nan ta considera importante. El a indica cu scucha pueblo y mantene e cercania aki ta un elemento cu mester sigui forma parti di e manera di traha den comunidad.

   Parlamentario Stephany Sevinger tambe a participa den e recorido y a describi Rancho como un bario caminda e ta sinti su mes na cas. E bishita a trece recuerdo personal di su tata y, segun Sevinger, a haci e momento ainda mas special.

   Sevinger a enfatisa cu cercania cu pueblo no mester limita na momentonan di campaña electoral, pero mester continua durante henter un periodo di gobernacion. P’e, ta importante pa sigui den contacto cu hende, tende kico ta nan necesidadnan y comprende e realidad di cada bario directamente for di e personanan cu ta biba aden.

   El a señala cu particularmente den un comunidad manera Rancho, e propio habitantenan por brinda un perspectiva importante tocante e situacionnan cu nan ta enfrenta y loke nan ta mira como necesario pa nan bario. E recorido, segun Sevinger, ta contribui na un forma di traha caminda comunidad tambe ta forma parti di e dialogo pa hiba Aruba dilanti.

   Un recibimento cu calor di comunidad: Entre e residentenan cu a comparti nan experiencia tabata Luz Marina Fonseca Flores, habitante di e area. Cu hopi entusiasmo, a expresa su satisfaccion di mira su comunidad limpi y a comparti su gratitud pa e cambionan positivo cu e ta experimenta.  Fonseca Flores a menciona tambe cu un aumento cu el a ricibi a representa un yudansa importante p’e den su bida diario. Su palabranan a refleha e impacto cu medidanan concreto por tin den realidad cotidiano di un persona.

   E encuentro a termina cu un gesto simpel pero significativo: Luz Marina a prepara awa di panela cu hopi amor pa comparti cu esnan cu tabata pasando den bario.

   E recorido di Accion di Bario den Rancho a mustra e importancia di no solamente wak e necesidadnan di un comunidad, pero principalmente tende nan directamente for di e hende cu ta biba ey. E combersacionnan cu residentenan ta brinda un imagen mas cercano di loke ta bay bon, unda tin preocupacion y unda ainda tin espacio pa sigui traha hunto.