Accion den Bario ta sigui crece

Mas cerca di comunidad:

ORANJESTAD (AAN): Diahuebs mainta Prome Minister Mike Eman y su team, hunto cu Stichting Rancho, Serlimar, City Inspector, DVG y Fundacion Pa Nos Comunidad, a bishita Socotorowijk, Rancho, como tambe Yobastraat/Driemasterstraat, pa scucha directamente preocupacionnan di e habitantenan.

E accion den bario a cuminsa for di 8:30 di mainta, conhuntamente cu trabounan di limpiesa manera recoge desperdicio den vecindario.

Durante e recorido, hopi habitante a habri nan porta pa ricibi e Prome Minister y su ekipo, probechando e oportunidad pa combersa directamente y comparti nan preocupacionnan.

Un di e temanan principal tabata e problema di desperdicio. Diferente residente a mustra nan satisfaccion cu e iniciativa, señalando cu despues di ciere di dump, a bira dificil pa deshaci di desperdicio, causando acumulacion den algun area.

Danki na Accion den Bario, e situacion aki a haya alivio, permitiendo habitantenan haci limpi rond di nan cas y mehora e ambiente di bida den bario.

Durante e bishita, Prome Minister a topa cu varios pensionado cu a expresa nan agradecimento pa e aumento di Afl. 500 den pensioen. Segun nan, e apoyo a yega na un momento importante, considerando e costo di bida.

Un di e pensionadonan a comparti cu, despues di tende e anuncio, el a sinti gran alegria, y awor ta experimenta e beneficio directamente. Gastonan cu anteriormente tabata dificil pa cubri, awor a bira mas manehabel.

Na mes momento, habitantenan a haci un apelacion na comunidad pa coopera y asumi responsabilidad. Mantene bario limpi ta un responsabilidad comparti, y a enfatisa importancia di evita dump ilegal y duna bon ehempel na generacion mas hoben.

E iniciativa di Accion den Bario ta positivamente ricibi pa habitantenan, kende a expresa nan aprecio pa e acercamento directo di gobierno den comunidad.