Minister Gerlien Croes:
ORANJESTAD (AAN): Ayeranochi a tuma luga un reunion informativo cu centronan di opvang di mucha den aula di Universidad di Aruba. E reunion tabata dirigi pa informa riba e desaroyonan reciente na nivel di maneho nacional, legislacion y e implementacion di e Landsverordening Kinderopvang, cu ta forma un paso importante den profesionalisacion di e sector.
Durante e reunion, mas di 80 participantenan a ricibi un actualisacion amplio riba e direccion strategico di e maneho pa opvang di mucha na Aruba. A trata diferente tema relevante, manera e importancia di cumpli cu e normanan legal, fortalecemento di supervision y garantisacion di un ambiente sigur pa tur mucha.
Ademas, a pone enfasis riba calidad di e servicio, desaroyo profesional di personal y maneranan con centronan di opvang por sigui eleva nan standardnan pa ofrece un cuido y guia adecuado na cada mucha. E dialogo habri durante e reunion a permiti un intercambio constructivo di ideanan y experencianan entre participantenan, cu e meta comun di mehora e sector.
E reunion aki ta forma parti di un proceso continuo di colaboracion entre gobierno y e centronan di opvang, reconociendo e rol esencial cu nan ta desempeña den desaroyo trempan di nos muchanan y den sosten di nos comunidad.
Hunto, nos ta sigui traha pa un opvang di mucha cu ta sigur, structura, di calidad y bon prepara pa responde na necesidadnan actual y futuro di tur mucha na Aruba.
{gallery}Reunion cu centronan di opvang di mucha riba desaroyonan den maneho, legislacion y calidad{/gallery}
