Accident a pone atleta Miljenka Franken keda paralitico y hospitaliza na Merca

Accident durante dragrace cu motorcycle

• Campaña intensivo pa recauda fondo pa yude 

ORANJESTAD (AAN): Den fin di siman cu a pasa, un situacion hororoso a presenta net na salida di un careda di motorcyle na estado di Maryland na Merca.

   E conocido coredor di Aruba, e dama Miljenka Franken riba Diabierna anochi, para na e start di e pista, y a haya luz berde pa start e careda di drag, sinembargo e motorcycle di dje a bay halto (hop) cu ne, y a wordo catapulta y cay riba su lomba, y a keda benta eybao.  Su miembronan di team na careda a bay atende, hunto cu personal di Emergency Services.

   Miljenka eybao tabata na tino y den prome prognosis di e Paramediconan, a puntre si e ta sinti su braza y pianan.  Aki Miljenka a bisa cu e no  ta sinti ningun di e dos pianan, y no por move su tenchinan tampoco.

   Asina el a yega na Hospital unda cu a mira e severidad di e herida, y a opta pa lage move cu un vuelo di Medical Evacuation, for di Maryland rumbo pa un Hospital mas specializa na Washington, D.C.

   Na Washington D.C., specialistanan a haci un operashon di emergencia na su lomba y tambe weso di lomba. Lamentablemente e accidente aki a lag’e paralisa for di su heup bay abao.

   Famia y amigonan cu cu conoce Miljenka, sa cu e ta un esposa, mama y amiga increibel pa asina tanto hende. Su sonrisa y spirito ta contagioso y ta un hende hopi social. E tin 45 aña di edad y ta hopi activo y ta cuida su salud hopi.

   E obstaculo gigantesco aki cu el a topa cune awor, lo bay ta un cu yen di reto constante y grandi pa supera, pero e amigonan ya caba no tin duda cu e por haci’e cu yudansa y energia positivo.

   Si awor caba ta haciendo calculo, cu su gastonan medico, ahusta na bida diario y pa e yega bek Aruba lo ta sumamente enorme, yen di reto y hopi costoso.

   Pesey amigonan ta pidi tur yiu di tera, fanatico di dragrace, amigonan, y demas ciudadano, pa brinda asistencia pa yud’e. E ta na Merca aworaki sin famia y amigunan di su mayornan.

   Riba Dialuna personanan hopi liga na dje a habri un cuenta di GoFundMe riba internet, cu ta yuda acumula placa pa e causa aki.  Cualkier donacion haci lo bay directamente pa cuido di Miljenka.

   Esnan cu kier bay na e website di GoFundMe por haci’e mas facil via e website aki:

www.bit.ly/miljenka

   Esey ta habri e GoFundMe cu ta e account pa dune sosten.  Dialuna mainta den apenas 2 ora di tempo, nan a acumula riba di 5 mil Dollar.  Merdia ya caba nan a sobrepasa e suma di 12.000 Dollar, y pa 7’or di Dialuna anochi nan tabata acercando donacion di $20.000, danki na donacion di como 300 persona.