Jessica Ras di Formacion Social-SVT:
ORANJESTAD (AAN): Cu e meta di ofrece hobennan mucha homber orientacion y un oportunidad pa sigui desaroya nan mes, Formacion Social-SVT a habri inscripcion pa su proximo grupo, SVT-22. E trayecto, cu lo cuminsa dia 8 di maart 2027, ta dirigi na hobennan cu, entre otro no ta bay scol, no ta traha of ta den necesidad di sosten adicional pa haya un direccion nobo den nan bida.
Den un entrevista cu DIARIO, Jessica Ras di Formacion Social-SVT a splica cu e programa ta ofrece un oportunidad pa hobennan cu, pa diferente circunstancia, a stop di bay scol y no ta traha. Tambe e ta destina pa esnan cu ta pasa hopi tempo riba caya of simplemente mester di un impulso pa haci algo diferente.
Ras ta haci un yamada na mayornan cu ta considera e trayecto como un oportunidad pa nan yiu homber, pa tuma contacto mas pronto posibel. El a splica cu inscripcion ta sigui pa un proceso di seleccion cu ta tuma tempo. Como parti di e proceso aki, e hobennan lo participa den diferente actividad, durante cua SVT lo evalua nan pa determina ken lo forma parti di e proximo grupo.
Mayornan interesa por tuma contacto via WhatsApp na 5645339. Despues di e prome contacto, lo coordina un cita pa inscripcion y duna mas informacion tocante e siguiente pasonan.
Ras a informa tambe cu e grupo actual, SVT-21, lo finalisa Fase 1 na fin di aña y ta sigui pa Fase 2. E parti di stage y cursonan ta programa pa cuminsa na januari 2027.
Cu apertura di inscripcion pa SVT-22, Formacion Social-SVT ta invita mayornan y hobennan pa explora e posibilidad di participa den e trayecto. Tuma contacto na tempo ta e prome paso pa inicia e proceso di seleccion y considera un oportunidad nobo pa formacion y desaroyo personal di e hoben.
