Mal uso di un proceso sumamente importante pa sistema educational
- Hobennan mester raporta ora core stage ta bira trabou barata
- Empresanan prestigioso Arubano semper tabata porta pa futuro
ORANJESTAD(AAN)- “Maestronan mester pone atencion na loke por ta pasa cu alumnonan cu mester core stage como parti di nan estudio.”
Esaki ta advertencia cu a alcansa DIARIO di parti di informantenan cu ta sumamente preocupa cu loke por pasa cu studiantenan cu pa nan estudio mester sigui e parti practico, conoci como stage.
E parti practico di un estudio ta sumamente importante pa estudiantenan cu asina den practica ta cera conoci cu situacionnan, cu den buki no ta bini dilanti.
Ta di aplaudi con mayoria di empresanan na Aruba ta honra e oportunidad pa nan yuda den educacion di hobennan.
Con e parti practico di estudio hopi bez ta habri caminda pa labor permanente, ta algo cu DIARIO a trece dilanti algun tempo pasa ora nos a mustra riba e motibo cu cantidad di studiante di Aruba no ta bolbe for di Hulanda ora nan termina nan estudio pasobra ya pa medio di stage nan ta haya trabou.
Sinembargo, segun informantenan, sigur den cierto ramonan cu ta uza hobennan cu ta core stage, abuso ta wordo haci di e hobennan cu ta wordo usa como trahador na un prijs barata.
Esaki por bira hasta peliger pa e estado di salud di un hoben cu mester studia y traha pero tambe tambe pa e persona cu ta wordo atende dor di un persona cu no ta cualifica ainda pa haci e trabou.
“Maestronan y mayornan mester sigui e comportacion di hobennan cu mester haya mas atencion den e mundo actual. Hopi mayor mes ta traha y ora nan yega cas no ta ripara kico ta pasa cu nan yiu. Pero e resultadonan por ta grave pa e mucha,” a bini dilanti.
Tin hoben cu ta wordo uza dor di cierto establecemento y instancia cu mester tin cierto cantidad di trahador den nan servicio.
E hobennan cu mester core stage, ta wordo uza pa evita cu nan ta paga personal pa e trabou cu e hobennan mester haci.
“Stage no por afecta bida y salud di e hobennan,” informante clave a trece dilanti.
Cuanto hora un hende por dedica na traha y studia, tabata e pregunta grandi.
Aparentemente tin hobennan cu ora nan yega school, no ta sigui les manera mester ta, pero ta cansa y practicamente ta drumi durante e lesnan cu ta esencial pa nan futuro.
“Ta na varios por a papia di hobennan cu ta bira victima di nan estudio pasobra nan ta core stage y no ta haya oportunidad pa relaha, pa drumi ni pa come manera mester ta,” informantenan a trece dilanti.
Informacion cu a wordo presenta ta suficiente pa bati alarma pa schoolnan tin un bon relacion cu nan studiantenan cu ta sigui stage pa asina evita abuso.
“E hoben cu ta core stage no ta un trahador profesional. E ta studia pa bay haci e trabou. Sigur no por pone un hoben cu ta core stage haci trabounan cu personal no kier haci,” informantenan a indica.
Vigilancia di e estado di e hoben mester ta presente na school, cu mester tuma medida si nota cu un mucha ta drumi continuamente bou di les of no ta capaz pa sigui loke ta wordo splica.
“Tin hoben cu ta admiti cu ta na school nan ta haya oportunidad di drumi y relaha durante les,” un informante a indica.
DIARIO ta trece dilanti cu no ta trata di un mayoria di empresanan y instancianan caminda hobennan ta haya oportunidad di cera conoci cu nan estudio den practica.
E gran mayoria cu ta acepta stage, ta ofrece e hobennan oportunidad pa crece den e ramo y hasta na varios ocasion trabou.
Pero, manera informantenan ta trece dilanti, mester scrap abuso cerca cualkier instancia cu ta abusa di stage.
Esaki ta solamente posibel pa medio di un bon contacto cu e hobennan, cu mester por expresa nan mes sin miedo pa asina stage, cu ta sumamente importante, por alcansa su proposito pa tur hoben y no wordo abusa.
