ORANJESTAD (AAN): Aruba su recuperacion ta mustra den direccion di uno positivo y fructifero. Turistanan ta ansioso pa cuminsa viaha y ta sondia pa bay di vakantie na e destinacionnan cu tin mas
grado di vacunacion. Unda nan por ta sigur cu e transmision di e virus di COVID ta uno minimo.
Aruba actualmente ta luciendo na nr 1 entre e islanan den Caribe y na number 2 entre e paisnan miho vacuna di mundo. Esaki sigur ta motibo pa e comunidad sinti orguyoso y tambe encurasha esnan cu ainda no a forma parti di e solucion pa haci esaki y vacuna.
Mas lihe yega entre 75% cu 85% di comunidad mas lihe lo recupera nos pilar turistico y nos economia.
Entrante awe diaranson 28 di april 2021, ya no tin necesidad mas pa warda riba un cita pa vacuna. Esnan cu no a ricibi su prome vacuna ainda por registra via Aruba Health App of via www.dvg.aw of ww.arubacovid19.org y despues 'walk in' na e localidadnan Teresita Center of Centro Libertador Betico Croes y ricibi nan prome vacuna.
Esnan cu no por registra online tambe por yega na e puntonan di vacunacion y lo wordo registra y vacuna tambe. Pa di dos dosis di vacuna si ta necesario yega na e cita acorda caba.
Na e momento aki Aruba tin 54% di e grupo di meta 18+ vacuna y ta encurasha tur cu ainda no a vacuna pa den e dianan cu ta sigui, yega y vacuna y contribui na nan propio salud, na Aruba su recuperacion y futuro.
