A reconoce Angel Rojer como Pionero den Aruba su turismo

ORANJESTAD (AAN): Riba dia 27 di September rond mundo ta celebra “Dia Mundial di Turismo”.

   Den cuadro di esaki, Gobierno di Aruba ta reflexiona riba e periodo di crisis cu a impacta Aruba su turismo y reconoce personanan visionario cu a contribui grandemente na desaroyo turistico di Aruba.    Turismo ta pilar economico di Aruba, pesey riba “Dia Mundial di Turismo” e ta importante pa para keto y reflexiona riba diferente aspecto cu a tuma luga den transcurso di e añanan.

   Den transcurso di añanan, Aruba a conoce diferente persona cu e animo y curashi aki, pero tambe cu hopi determinacion y cu vision pa progreso di nos isla.  Na 1974 (48 aña pasa) señor Angel Rojer a inicia su trayecto den industria turistico di Aruba cu solamente 2 camber y un vision di yega na mas camber. Mirando e demanda cu tabatin na Aruba, señor Rojer a expande pa 4 camber y despues 6 y asina a sigui pa 10 camber. Señor Rojer tabata traha 12 ora pa dia y tabata encarga cu diferente trabou sea e tabata traha cu coriente, tuberianan/ ‘plumbing’ y administracion.

   Actualmente, Coconut Inn tin 40 camber y ta un Boutique Hotel renombra na Aruba cu 12 empleado. Ta danki na personanan manera sr. Angel Rojer, su famia y cada trahado di Coconut Inn, cu Aruba ta marca historia como un di e paisnan cu ta recuperando economicamente mas liher y mas fuerte, danki na e recuperacion turistico.

   Pesey riba e Dia Mundial di Turismo, den nomber di Gobierno di Aruba ta reconoce sr. Angel Rojer pa su contribucion den sector di Turismo di Aruba. “Danki pa bo 48 aña di dedicacion, dinamismo y profesionalismo contribuyendo na Aruba su desaroyo como “Tourism Ambassador” Embahador di nos turismo.”    Pabien na sr. Rojer y henter su famia cu ta sostene.