ORANJESTAD (AAN) – Awe, Dia 29 di September ta wordo conmemora e Dia Mundial di Curazon. Señora Iraida Thijsen, Nutricionista di IBiSA,
a bisa den entrevista cu DIARIO, cu riba e dia aki na henter mundo, enfasis ta wordo haci riba e importancia di un bon salud di nos curazon y di tratamento.
“Den nos caso, na IBiSA nos ta purba enfoca riba e parti di prevencion, conhuntamente cu e miembronan di e Plataforma Promocion di Salud, cu ta forma pa diferente instancia manera DVG, IBiSA mes ta aden, Hospital, SVb, AZV, FADA, POHAS. Nos ta purba hunto enfoca riba e temanan cu ta importante riba e dia aki, vooral den e parti di prevencion y control di salud”, Iraida Thijsen a señala.
Thijsen a agrega: “Manera nos tur sa, nos estilo di bida tin hopi di haber cu nos salud, y specialmente riba e salud di nos curazon y nos adernan. Pa e motibo ey ta importante pa nos pone enfasis riba esaki, y pa bo keda controla na tempo pa si tin algo, bo por keda adapta na bo sistema di biba”.
Thijsen a subraya cu tin varios factor cu tin influencia riba e curazon. No solamente con e persona ta come (locual tin hopi influencia) pero e factor di actividad fisico y e parti di drumimento y stress. Con bo ta maneha stress. Tur esey tin influencia riba e curazon, y por supuesto locual cu semper Plataforma di Salud ta boga pe, ta pa stop, por ehemplo humamento, y bebemento di alcohol di mas cu tambe tin su influencia riba salud di nos curazon.
“Nos tin diferente factor cu nos tin cu tene cuenta cune, pa purba tene nan den balans, anto asina ey bo ta purba di hiba un bida mas saludable, cu tin su beneficionan pa bo curazon y adernan. Papiando tocante personanan mas hoben di 40 aña, cu podise no ta haci ehercicio, na Mei Plataforma di Salud a bishita diferente hotel, pa haci un campaña den Dia Mundial di Presion, y ora nan tabata bezig cu e data a constata cu cu hopi di e adultonan di 40 of 50 plus, ta mas saludable cu e hobennan di 25 y 30 aña.
“E ora ey nos ta puntra ‘kico ta pasando?’ Y den cuadro di esey nos a purba di bay bek na e hotelnan pa find out kico ta e hechonan, pa asina ey duna un servicio un tiki mas enfoca riba e personal di e hotelnan of instancianan aki, cu nos a bishita. Y berdad esey ta algo cu a cay na nos wowo, anto nos a haya hopi interesante pa wak con e muchanan aki, cu ya tin presion halto, cu eigenlijk nos no ta custumbra cune, con nan ta come, con nan ta hiba nan bida, etc., etc. Dus, enberdad tabata un factor cu a hala nos atencion, na e momento ey”, Iraida Thijsen a comenta.
Esaki ta un preocupacion pa nan y nan ta bezig trahando riba un campaña “sa bo number” pasobra nos kier pa tur hende sa nan number, pero door di e resultadonan nan a para pensa un rato, y bisa cu mihor nan ta bay profundiza un tiki mas den pakico e resultadonan ta asina.
