Melva Croes-Yanez di Fundacion Alzheimer
“Nos tin aworaki un 19 caso cu ta drentando”
ORANJESTAD (AAN)—Señora Melva Croes- Yanez, den su entrevista cu Matutino DIARIO, di Fundacion Alzheimer, a expresa cu na Aruba, sigur, e adulto mayor no ta wordo tuma na serio.
El a menciona cu el a yega di toca e tema aki tambe, durante e Simposio. “Un adulto mayor cu ta den problema di abuso na cas, etc., si e ta bay polis, bo ta haya cu polis ta bisa ‘si, pero dokter a bisa toch cu e tin Alzheimer, anto kico bo ta kere cu nos mester haci?’ Y e persona ey, di un dia pa otro, no ta wordo tuma mas na serio”, señora Croes-Yanez a señala.
El a agrega cu hopi biaha e persona aki ta bay un dokter, cu su ser keri, y e dokter ta papia solamente cu e ser keri. “E no ta mira mes e persona, pasobra ya el a tuma su decision caba, cu e persona aki ta di 70 aña caba pariba, y eigenlijk e no ta conta mas.
Eigenlijk, tambe bo ta mira cu e decisionnan ta wordo tuma over di e persona. E persona mes no tin nada mas di bisa. Y eynan bo ta bay haya bo cu abusonan, pa no duna diagnostico. Tambe, por encera cu bo ta yuda esun cu tin gana di haci abuso, cu e adulto mayor”, Melva Croes-Yanez a señala.
Na e Fundacion ta yega keho cu cosnan asina ta tumando lugar na Aruba, Croes-Yanez a asegura y e fundacion tin prueba! “Nos tin aworaki un 19 caso cu ta drentando. E problema cu nos tin ta cu ora bo ta yega asina leu, cu e hendenan mester bin dilanti, pa nos bay haci e keho oficial, bo ta mira cu nan ta trek bek”, Melva Croes-Yanez a duna di conoce.
Esaki ta e punto cu Melva Croes kier yega na comunidad cu ne. Den nos siguiente edicion lo amplia al respecto.
