A lanza proyecto piloto pa scolnan basico pa siña agricultura sostenibel

Minister Ursell Arends:

*Usando tecnicanan di Agro Forestry 

ORANJESTAD (AAN) — Den conferencia di prensa, Minister Ursell Arends, titular di Transporte, Medio  Ambiente, Sector Primario, Integridad, y Asuntonan di Adulto Mayor, a sinti su mes honra di tabata presente, den e lanzamento di e proyecto piloto pa scolnan basico cu a keda anuncia Dialuna, y cu lo tuma lugar hunto cu Living Soil Aruba.

            E mandatario a expresa cu riba Dialuna 16, Dia di Alimentacion, e ta anuncia desaroyonan  positivo pa loke ta trata Sector Primario. Arends a subraya cu Ministerio di Naturaleza ta trahando riba diferente desaroyo positivo y Dialuna nan a para keto pa lanza un proyecto piloto, un iniciativa pa scolnan basico. “Asina aki, nan por registra pa tin un plantacion di Agro Forestry na nan propio scol. E iniciativa aki, tin como meta pa educa e siguiente generacion riba e balornan di agricultura sostenible, y mas cu tur cos, promove e interes di sector primario”, Minister Arends a señala.

            E muchanan ta haya oportunidad educativo pa siña agricultura sostenible, usando tecnicanan di Agro Forestry, pa mehora e calidad di suela y principalmente elimina uzo di pesticide. “Ademas di esaki e proyecto ta aporta na e seguridad di alimentacion y auto-suficiencia cu enfoke riba scolnan cu kizas por tin limitacion pa por yega na e proyectonan aki, kizas pa limitacionnan financiero.

            Scolnan por cuminza registra ya for di 1 di November caba te cu 15 di November. E aña aki, e directivanan di scol lo haya carta cu tur splicacion, cu tur e detayenan relaciona cu e proyecto aki; un total di diez scol lo wordo scogi pa participa den dje a base di un criterio specifico, y criterionan ta manera e motivacion di scol, tereno disponible cu tin awa y coriente accesible, y tambe e compromiso di scolnan pa participa den e proyecto aki”, Minister Ursell Arends a menciona.

            El a agrega cu e Ministerio di Medio Ambiente ta trahando conhuntamente cu Santa Rosa, y tambe cu Living Soil Aruba, pa duna guia na scolnan, con nos por yega na sostene y tambe brinda nan e materialnan necesario, pa e planificacion y plantacion di e matanan y tambe con pa anda cu e tereno mes.          “Ademas e personal di scol y e boluntarionan lo ricibi training tocante e tecnicanan di Agro Forestry, mantencion y cuido di e plantacion di mata, y tambe e integracion di esaki den e curriculum escolar. Mi ta kere cu tur e partnernan cu ta participando, tanto Living Soil como Santa Rosa, nos por garantiza un ehecucion exitoso di e proyecto aki”, Minister Ursell Arends a remarca.