Prestamo pa Covid-19 y e motibo cu tin Marina Real na Aruba
*Covid-19 no tabata maneho politico pero atake di un enemigo
*Leynan di Guera a wordo aplica pa scapa tur Hulandes na mundo!
ORANJESTAD(AAN)—Na momento cu un politico Hulandes presta huramento pa asumi su trabou den gobernacion di Hulanda, e ta na haltura cu e ta bira gobernante no solamente di Hulanda pero tambe e ta dicidi como miembro di e Conseho di Ministro di Reino, pa bienestar di tur ciudadano Hulandes na mundo.
Un ciudadano Hulandes no ta un persona cu ta biba na Hulanda, pero e ta e portador di un pasaporte Hulandes cu ta duna legitimidad na su persona pa ricibi tur e proteccion y defensa cu e mester como subheto di e Hefe di Estado di e pais.
Ora papia di un “Reino” no ta papia di un teritorio solamente, pero ta papia na prome lugar di e totalidad di personanan cu ta subdito (onderdaan) di e Rey y tin e derecho di porta un pasaporte cu ta cualifica nan como tal.
E Arubiano ta un ciudadano Hulandes.
Den caso di Aruba esaki ta algo serio, pasobra ta ora a pusha Aruba lomba contra muraya, e Arubiano practicamente a wordo forsa pa vota pa independencia di Aruba.
E hecho cu ex Prome Ministro Nelson Oduber, a percura pa a scrap e fecha di independencia cu lo a comberti Aruba den un republica pa motibo di rechaso di Reino pa Status Aparte, tabata e realizacion di e lucha pa Status Aparte cu Betico Croes a introduci como formula pa autonomia di Aruba.
E ciudadano Arubano ta parti di Reino Hulandes manera ta wordo regla den e Constitucion di Reino Hulandes y den e acuerdo pa relacion entre e paisnan di Reino, cu ta partnernan igual.
Aruba mescos cu Hulanda, Curacao, Sint Maarten y Islanan BES, ta parti di Reino, cu mester ricibi proteccion di nan integridad cu ta encera tambe nan bida, nan bienestar y nan integridad.
Defensa directo di Aruba como teritorio ta den man di Marina Real di Reino Hulandes. Ley ta segura e proteccion total di e ciudadano Hulandes nace na Aruba mescos cu e ciudadano Hulandes, cu a nace na cualkier otro parti di Reino Hulandes.
E Arubiano tin derechonan total riba asistencia di Reino paden y pafor di Aruba y den tur situacion cu ta menasa su bida, propiedad, bienestar.
Ora papia di e Pandemia Covid-19 no ta papia di un enfermedad, cu mester a haya atencion a base di leynan cu ta atende cu Salud Publico, cu entre otro pues Cuido Medico na Aruba y ta den man di Gobierno Arubano.
Covid-19 tabata un “ramp”, un desaster, cu a menasa e bida di e Arubiano directamente y a destrui e base di produccion y garantia di e bienestar di e Arubiano, cu ta ciudadano Hulandes.
Pues e bida di e ciudadano Hulandes tabata na peliger y tabata motibo cu leynan di guera manera toque de queda a wordo introduci.
Un asunto legal, cu no ta directamente regla den Statuut ta mira luz. Den Statuut papel di Reino den invasion di un enfermedad no ta wordo regla.
Covid-19 tabata un invasion, aunke no militar. Covid-19 a exigi pa introduci leynan aplicabel den tempo di guera, cu hasta a haci posibel pa deshaci di e derecho di e ciudadano pa subi caya manera e kier.
Mester a cera fronteranan di Aruba y medidanan di Gobierno Wever-Croes a haci cu e cantidad di hende cu a perde nan bida den e invasion di Covid-19 a keda limita.
Pa proteha e ciudadano Hulandes tabata tin mester di placa na tur pais den Reino cu a haci prestamo. Gobierno di e pais di Reino Hulandes, Hulanda, tambe a haya su mes na careda.
E prestamo di Covid-19 cu awe ta wordo duna na Aruba den un situacion cu hasta ta pone hende pensa den direccion di black mail, mester wordo atende den cuadro di e realidad di e Arubiano como ciudadano Hulandes den un desastre mundial.
Gobierno di Reino por pidi Prome Ministro Wever-Croes splicacion di e forma cu a atende cu e sumanan cu a wordo uza na momento di Covid-19 cu ta comparabel cu desastrenan natural.
E forma cu na su salida, Alexandra van Huffelen Secretario di Estado di Hulanda ta atende cu Aruba, ta crea e impresion cu ta como mendigo y no como pais di ciudadanonan Hulandes, Aruba a busca un prestamo pa scapa bida di ciudadanonan Hulandes.
E ultimo Gobierno di Mark Rutte, cu a alaba Mike Eman ora Mike Eman a deshaci di mitar di entrada di belasting di Aruba, na final di su periodo como Conseho di Ministro di Reino, a mustra un cara berdadero cu no ta refleha Statuut!
Na caminda pa 2024, Aruba lo mester sigui traha pa alcansa un prestamo cu menos interes, pero berdad ta keda skirbi den historia di Reino Hulandes.
