Ministro Ursell Arends:
ORANJESTAD (AAN): Durante conferencia di prensa di Dialuna mainta, Minister Arends a informa comunidad di Aruba ariba e taskforce cu a worde institui pa mantene e maneho pa loke ta trata UTV/ATV y otro sorto di vehiculonan.
Na Aruba nos por wak diferente vehiculonan di motor circulando nos careteranan, pa garantisa orden ta necesario pa varios departamento y instancia traha hunto. Pa es motibo dia 30 di maart 2023 a institui e taskforce cu ta consisti di Departamento di Transporte Publico(DTP), Korps Politie Aruba (KPA), Dienst Technisch Inspectie (DTI), Departamento di Impuesto (DIMP), Aruba Tourism Authority (ATA) y Ministerio Publico (OM).
E meta di e taskforce ta pa garantisa e cumplimento di ley y reglamentonan relaciona cu UTV, ATV, y otro sorto di vehiculo di motor manera entre otro step electrico y Segways, a traves di un enfoke multi disciplinario. Tambe lo percura pa un maneho(handhavingsbeleid) relaciona cu velocidad, keuringsbewijzen, recibo di pago, impuesto di vehiculo di motor, standard di conducta (gedragsnormen) y permisonan/vergunning necesario di e vehiculonan di motor menciona.
Esaki ta pa trece orden den trafico pa limita e riesgonan cu e vehiculonan aki ta trece cu ne manera accident, lesion y dañonan. Tambe a worde menciona cu control riba e problematica di auto di huur cu A-nummerplaat lo worde atendi cu ne.
E taskforce ta encarga pa ehecuta un maneho eficaz y eficiente unda lo tene na cuenta cu e gran mayoria di e usuarionan ta consisti di turista, y lo aplica cu severidad amigabel.
Den luna di augustus lo bay over na e fase di conscientisacion unda lo tene sesion informativo cu stakeholders y despues lo cuminsa cu accion. Cu esaki ta referi cu 'handhavingsbeleid' lo worde implementa den forma di control, multa si acaso cu no ta cumpli cu ley y reglamento y si ta necesario vehiculonan lo worde baha for di caminda publico.
Ta duna oportunidad na doñonan di vehiculonan pa cuminsa na regla tur nan documentonan manera ley ta stipula. "E ta un responsabilidad cu comunidad di Aruba ta comparti ora ta trata di siguridad den transporte publico, y nos tur tin cu haci di nos parti pa garantisa esaki," Minister Arends ta termina.
